Hukumat qarori bilan Yo`l harakati xavfsizligini ta`minlash va zamonaviy yo`l infratuzilmasini tashkil etish sohasida davlat-xususiy sheriklikni amalga oshirish tartibi to`g`risidagi vaqtinchalik nizom tasdiqlandi. Bu haqda Adliya vazirligining "Huquqiy axborot" kanali xabar berdi.
Nizomga muvofiq, davlat-xususiy sheriklik loyihasi tashabbusi davlat tomonidan yoki xususiy sherik tomonidan chiqishi mumkin.
Tanlov o`tkazish uchun sherik huzurida kamida etti kishidan iborat Tanlov komissiyasi tashkil etiladi, uning tarkibiga mutasaddi tashkilot vakillari jalb etiladi.
Davlat-xususiy sheriklik shartlarida loyihalarda ishtirok etish xohishini bildirgan yuridik shaxs Tanlov komissiyasiga ariza beradi. Arizaga quyidagilar ilova qilinadi:
- davlat ro`yxatidan o`tkazilganlik to`g`risidagi guvohnomaning yoki boshqa hujjatning nusxasi;
- loyihani amalga oshirish uchun moliyaviy imkoniyatlar mavjudligini tasdiqlaydigan ma`lumotlar;
- investisiya loyihasi;
- investisiya loyihasining dastlabki texnik-iqtisodiy ko`rsatkichlari;
- majburiy yig`im to`langanligini tasdiqlaydigan hujjat.
Ariza o`n kun mobaynida ko`rib chiqiladi va Tanlov komissiyasi quyidagi qarorlardan birini qabul qiladi:
- tanlov e`lon qilish to`g`risida;
- davlat-xususiy sheriklik loyihasini amalga oshirishni rad etish to`g`risida;
- talablar buzilishini bartaraf etish uchun arizani qaytarish to`g`risida.
