15 mart kuni Humo Arena muz saroyi ochilish marosimida Shavkat Mirziyoyev ishtirok etadi.
Taklif qilingan mehmonlar orasida, shuningdek hukumat va parlament vakillari, viloyat hokimlari, jamoatchilik tashkilotlari, madaniyat va fan arboblari, O`zbekistonning etakchi sportchilari, diplomatik korpus vakillari hamda mehribonlik uylari bolalari bo`ladi.
Ochilish marosimining asosiy g`oyasi – qishgi sport turlari hamda muz saroyi arxitekturasining uyg`unligi mavzusi bo`ladi. Asosiy arenada yozgi va qishgi sport turlari sportchilari o`z mahoratlarini namoyish etishadi.
Tantanali ochilish marosimini lazer shou hamda 3D animasiya, "Shelkunchik" spektakli va musiqali shou dastur davom ettiradi.
Eslatib o`tamiz, Xumo Arena qurilishi 2017yilda boshlangan edi. Sport majmuasida xokkey, short-trek, figurali uchish va kyorling kabi qishgi sportlar bo`yicha musobaqalar o`tkazish, shuningdek, konsert, ko`rgazma va forumlar tashkil qilinishi mumkin.
Xumo Arena 7 qavatdan iborat bo`lib, uning umumiy maydoni 82 ming metr kvadrat. Majmua 12 ming tomoshabinga mo`ljallangan. Shuningdek u erda 1600 o`rinli avtoturargoh bor.
Bino qurilishida 4 mingdan ortiq ishchilar ishlagan, Germaniya, Rossiya, Avstriya, Ispaniya, Fransiya, Italiya va boshqa mamlakatlardan 10 dan ortiq hamkor kompaniyalar jalb qilingan.
Humo Arena umumiy qiymati - 1,5 trillion so`m bo`lib, undan 185 million AQSh dollari - xorijiy investisiyalardir.
