O`zbekiston elektron ommaviy axborot vositalari milliy assosiasiyasi boshqaruvi raisi Firdavs Abduxoliqov Katta Langar Qur`onining faksimile nusxasini O`zbekiston musulmonlari idorasi raisi, muftiy Usmonxon Alimovga taqdim qildi. Bu haqda O`zEOAVMA matbuot xizmati xabar berdi.
Prezident tomonidan Islom dini qadriyatlarini asrab-avaylashga qaratilgan tashabbuslarga mos ravishda milliy assosiasiya rahbari tomonidan masjid-madrasalardagi qadimiy bitiklarni tadqiq etish va xalqimizga etkazishda katta ishlar qilinganini muftiy Usmonxon Alimov alohida qayd etdi.
Xususan, Qur`oni karimning ushbu nusxasi juda ham tabarruk ekani, u O`zbekiston musulmonlari idorasining muzey-kutubxonasiga joylashtirilishini bildirib o`tdi.
Muftiy jumladan, qadimiy qo`lyozma asarlarini yurtimizga olib kelishda diniy idora va ulamolar hamkorlik qilishga doim tayyor ekanini ta`kidladi. Milliy assosiasiyasi rahbari ayni vaqtda xorij mamlakatlarida saqlanayotgan ulug` mutafakkirlarimiz bitgan qadimiy qo`lyozma asarlarining faksimile nusxalarini yurtimizga olib kelish sa`y-harakatlari olib borilayotganini aytdi.
Qadimiy Katta Langar Qur`onining mazkur faksimile nusxasi boshlangan ishlarning ilk natijasidir. Islom dinining asosiy manbasi hisoblangan Qur`oni karimning eng qadimiy nusxalari xalqimizning bebaho merosi sifatida qadrlanadi. Hozirda ma`naviy meroslardan biri bo`lgan VIII asrga oid Katta Langar Qur`onining 13 ta sahifasi O`zbekiston musulmonlari idorasi muzey-kutubxonasida saqlanmoqda. Endilikda uning yonida qolgan sahifalarning faksimile nusxasi ham o`rin oladigan bo`ldi.
