Mudofaa vazirligi tarkibidagi harbiy okruglarda mudofaa ishlar boshqarmasi huzuridagi chaqiriluvchilarni harbiy texnik-mutaxassisliklar bo`yicha tayyorlash markazlarida yiliga 700 nafarga yaqin harbiy chavandozlar tayyorlanadi. Bu haqda Markaziy harbiy okrug matbuot xizmati ma`lum qildi.
Mazkur o`quv markazlari faoliyati Prezidentning 2018 yil 12 dekabr kunidagi PQ-4061 sonli qaroriga muvofiq, Mudofaa vazirligi tarkibida tashkil etildi.
Shuningdek, Mudofaaga ko`maklashuvchi “Vatanparvar” tashkilotidagi ayrim mutaxassisliklar ya`ni aloqa, oshpaz, haydovchi yo`nalishlarida o`qitish 2019 yilning yanvar oyidan vazirlik zimmasiga yuklatildi.
Hozirgi vaqtda Markaziy harbiy okrugiga qarashli Jizzax viloyati mudofaa ishlar boshqarmasi huzurida 100 nafar harbiy chavandozlar bilan mashg`ulotlar tashkil etilgan.
Ushbu dargohda mudofaa vazirligi hamda markaziy harbiy okrug qo`mondonligi tomonidan moddiy-texnik bazasini takomillashtirish va tayyorlovdagi mutaxassisliklarni son va sifat darajasini yaxshilash bo`yicha chora-tadbirlar ko`rilmoqda.
Jumladan, markaz rahbari – harbiy lavozimi ochildi. Shu bilan birga, respublika miqyosida “Eng yaxshi markaz” tanlovi o`tkazilmoqda. Ayni damda Samarqand, Jizzax va Navoiy viloyatlaridagi o`quv markaz faoliyatiQurolli Kuchlar bosh shtabiga qarashli Tashkiliy safarbarlik bosh boshqarmasi ofiserlari tomonidan tekshirilyapti.
Respublika bo`yicha 14 ta o`quv markazi faoliyati yo`lga qo`yilgan bo`lib, yoshlar 6 oylik o`quv kurslarida o`qitiladi. Ushbu markazga chaqiruvchilar tibbiy ko`rik va imtihon asosida va chaqiruv yoshida bo`lgan (18-23 yosh) fuqarolar qabul qilinadi. Haftasiga 5 kunlik o`quv soati, harbiy kiyim-bosh, yotoqxona bilan ta`minlanib, mazkur tayyorlov kurslaridan o`tganlar imtiyoz asosida bir yillik harbiy xizmatga (chaqiruv komissiyasini qarori asosida) yuboriladi.
Ma`lumot uchun, mazkur o`quv markazlari barcha viloyatlarda, harbiy chavandozlik mutaxassisligi esa Andijon, Namangan, Farg`ona, Sirdaryo, Jizzax, Surxondaryo hamda Toshkent viloyatlarida mavjud. Ushbu ta`lim maskanlarida tahsil olgan chaqiriluvchilar kelgusida Mudofaa vazirligi, DXX chegara qo`shinlari hamda Milliy gvardiya qo`mondonligi tarkibida harbiy xizmatni o`tash ko`zda tutilgan.
