Avariya holatini yuzaga keltirgan IIB xodimi javobgarlikka tortilishi ma`lum qilindi

Xabaringiz bor, YouTube tarmog`ida IIB xodimining davlat raqami 01 067 VSC bo`lgan xizmat mashinasida dastlab qoida buzgani, so`ng avariya holatini yuzaga keltirgani tasvirlangan video paydo bo`lgani haqida xabar qilgan edik. Mazkur holatga Toshkent shahar IIBB munosabat bildirdi:

"Ijtimoiy tarmoqlar foydalanuvchilarini ichki ishlar xodimi yo`l harakat qoidasini buzganda (xizmat vazifasini o`tash kabi zarur holat bo`lmaganda), bunga Toshkent shahar IIBB qanday qarashi qiziqtirmoqda. Sharhlarda bunday hollarda beparvolik qilinishi haqidagi noto`g`ri fikrlar uchramoqda.   

Bu kabi fikrlar noto`g`ridir. Toshkent shahar Ichki ishlar bosh boshqarmasi ushbu masalada qat`iydir: qonun oldida hamma tengdir, yo`lda xatolikka yo`l qo`yildimi, uning ortidan ma`muriy javobgarlikka (ba`zida intizomiy javobgarlikka) tayyor bo`lish kerak. Shuningdek, IIOdagi xizmat insondan alohida mas`uliyatni talab qiladi, chunki u atrofdagilarga ibrat bo`lishi kerak. Ammo real hayot idealdan farq qiladi: xodim ham oddiy inson kabi, o`zining fe`lidan va hayotidagi holatlardan kelib chiqib belgilangan qoidani buzishi mumkin. Bunday holda YPX inspektorining bayonnomasi va keyinalik ushbu holat bo`yicha tekshiruv olib boriladi.

Masalan, 31-oktyabr kuni soat 15.42 da Nodir Temirov ismli foydalanuvchi “Voditeli Tashkenta (DRIVERS.UZ)” guruhida xabar qoldirdi: videoregistratorda qayd qilinishicha, shu kuni ertalab xizmat davlat raqamiga ega “Neksiya-3” rusumli avtomobil Choshtepa ko`chasidan harakatlanib, oqimdagi transport vositalariga xalal bergan. 

Ushbu harakat bilan Yo`l harakati qoidalarining 53-bandi, ya`ni “Haydovchi harakatlanishni boshlash, yo`nalishni o`zgartirish (qayta tizilish, burilish, qayrilib olish, quvib o`tish va aylanib o`tish) va to`xtashdan oldin bajarilayotgan manyovr xavfsiz ekanligiga va boshqa harakat qatnashchilariga xalaqit bermasligiga ishonch hosil qilishi kerak” qoidasi buzilgan. Ushbu ma`lumot bir nechta blogerlar va OAVlar tomonidan ham e`lon qilindi.

Ushbu fakt bo`yicha shuni ma`lum qilamizki, “Neksiya-3” rusumli avtomobil (davlat raqami 01 067 VSC) Shayxontoxur tumani ichki ishlar bo`limiga biriktirilgan. Bunday harakatlanishga sabab (misol uchun, zarur chaqiruv, huquqbuzarlik va hokazo) bo`lmaganligi aniqlandi. Avtomobilni boshqargan xodimga nisbatan keyingi kun soat 07:50 da O`zbekiston Respublikasi Ma`muriy javobgarlik to`g`risidagi kodeksning 128-5-moddasiga  muvofiq ma`muriy huquqbuzarlik haqidagi bayonnoma rasmiylashtirilgan. Unga ko`ra, transport vositalari haydovchilarining avariya holati yuzaga kelishiga sabab bo`lgan, ya`ni yo`l harakatining boshqa qatnashchilarini tezlikni, harakat yo`nalishini keskin o`zgartirishga yoki o`z xavfsizligini yoxud boshqa fuqarolarning xavfsizligini ta`minlash uchun o`zga choralarni ko`rishga majbur qiluvchi huquqbuzarlikni sodir etishi, – eng kam ish haqining o`n baravari miqdorida jarima solishga sabab bo`ladi.

Haydovchi bilan yo`llarda xatoga yo`l qo`yish mumkin emasligi haqida profilaktik suhbat o`tkazildi.

Xuddi shu kabi choralar boshqa holatga nisbatan ham qo`llanildi. Poytaxt Uchtepa tumani maxsus inspeksiyasi ijtimoiy tarmoqlar foydalanuvchilari xabarini qayd etishdi. Ya`ni: 29-oktyabr kuni soat 18:08 da Lolita Shah ismli foydalanuvchi yuqoridagi guruhda videoma`lumot qoldirgan edi, unda “Neksiya-3” avtomobili (davlat raqami 01 158 VSC) Farxod va Lutfiy ko`chalari kesishmasidagi svetoforning taqiqlovchi signalini mensimasdan harakatlangan.

Ushbu avtomobil Uchtepa tumani IIO FMBgak biriktirlgan bo`lib, uni boshqargan xodimga nisbatan O`zbekiston Respublikasi Ma`muriy javobgarlik to`g`risidagi kodeksning 128-4-moddasi ikkinchi qismi bo`yicha ma`muriy bayonnoma tuzildi. Unga ko`ra, Transport vositalari haydovchilarining svetoforning taqiqlovchi signaliga yoki yo`l harakatini tartibga soluvchining taqiqlovchi ishorasiga bo`ysunmasdan o`tishi, – eng kam ish haqining ikki baravari miqdorida jarima solishga sabab bo`ladi. Haydovchi bilan birofilaktik suhbat o`tkazildi.

Hurmatli, ijtimoiy tarmoqlar foydalanuvchilari! Biz tomondan olib boriladigan ichki ishlar haqida har doim ham sizga xabar bermaymiz, chuni ba`zida inson omili xizmat burchidan yuqori kelishini ko`rish, biz uchun oson emas. Ammo e`tiborimizga tushadigan barcha faktlar bo`yicha biz tomondan choralar ko`rilmasligi haqidagi fikrlar noto`g`ridir. Bunday hollarni oshkor qilish ham zarur emas: xabarni ommaga namoyish qilmasdan, to`g`ridan-to`g`ri o`zimizga jo`natgan insonlar buni bilishadi. Agar sizning registratoringizga yo`l harakati qoidasini buzayotgan xizmat avtomobili tushib qolsa va haydovchi-xodim xizmat vazifasini ado etayotganligiga ishonchingiz komil bo`lmasa – videoma`lumotni shaxsiy xabar ko`rinishida bizning rasmiy Facebook-sahifamizga jo`nating. Yo`l harakati qoidalariga rioya qilinishi biz uchun muhimdir, ayniqsa gap xodimlar haqida ketganida, bunday ma`lumotlar biz tomondan e`tiborsiz qoldirilmaydi.

Bu kabi ma`lumotlarni ommalashtirish keraksiz bahslarga sabab bo`ladi, xabar muallifi esa, muhokamani huquq doirasida saqlay olmasdan, haqorat qilishlar kabi boshqa qonunbuzarliklarga sabab bo`ladi. Sharhlovchilarga qonun oldidagi javobgarlik haqida eslatib o`tamiz: biror kishi tomonidan yo`l qo`yilgan huquqbuzarlik haqida fikr ulashib, o`zingiz huquqbuzarga aylanib qolmang. Har qanday fikrni haqoratlarsiz, birovning huquqini buzmasdan ifodalash mumkin. Fikr ifodalashda ziyolilarcha yo`l tutib, boshqalar uchun ibrat bo`ling va atrofdagilardan ham shuni talab qiling".