Yunusobod tumanida sodir bo`lgan YTHda “Matiz” 64 yoshli piyodani urib yubordi (video)

Toshkent shahar Ichki ishlar bosh boshqarmasi YTH haqida ma`lumot berdi. 

Bugun internet tarmog`ida piyoda ishtirokidagi YTH aks etgan video tarqaldi. Mazkur fakt bo`yicha shuni ma`lum qilamizki, ushbu yo`l-transport hodisasi poytaxtning Yunusobod tumani Chinobod ko`chasida 7-noyabr kuni soat 11:22 da ro`y berdi: “Matiz” rusumli avtomobil haydovchisi Islom O. belgilanmagan joydan yo`lni kesib o`tayotgan piyodani urib yuborgan.

YTH natijasida 64 yoshli Zulfiya U. tan jarohatlari olgan holida shahar klinik shifoxonasiga etkazilgan.

Shu o`rinda Toshkent shahar IIBB piyodalardan yo`lni belgilanmagan joydan kesib o`tayotganda (ayniqsa avtomobillar orasidan), haydovchi uchun o`z vaqtida chetlab o`tib bo`lmaydigan omilga aylanishi mumkinligini eslatib o`tgan. 

“Haydovchilarga murojaat qilmoqchimiz. Yodingizda bo`lsin, yo`l harakati qoidalariga binoan:
“Haydovchi harakatning serqatnovligini, transport vositasi va yukning xususiyati hamda holatini, yo`l va ob-havo sharoitini, shuningdek harakatlanish yo`nalishidagi ko`rinishni hisobga olgan holda transport vositasi tezligini belgilangandan oshirmasdan boshqarishi kerak. Tezlik haydovchiga ushbu Qoidalar talablarini bajarish uchun transport vositasining harakatini doimiy nazorat qilib borish imkoniyatini berishi kerak. Harakatlanish vaqtida haydovchi aniqlay olishi imkoniyatidagi xavf yuzaga kelsa, u transport vositasining tezligini u to`la to`xtashni ta`minlaydigan darajada kamaytirishi yoki to`siqni boshqa harakat qatnashchilari uchun xavf tug`dirmagan holda aylanib o`tish choralarini ko`rishi kerak”, — deyiladi xabarda.