O`zbekiston yoshlar ittifoqi Qashqadaryo viloyat Kengashi rais o`rinbosari - viloyat “Kamalak” bolalar tashkiloti raisi lavozimida ishlab kelayotgan Nilufar Boyqobilovna Nazarova Qashqadaryo viloyat yuridik kolleji direktorining Yoshlar masalasi bo`yicha o`rinbosari lavozimiga tayinlandi. Bu haqda Qashqadaryo viloyati hokimligi Axborot xizmati xabar berdi.
Nilufar Nazarova bir vaqtning o`zida viloyat Adliya boshqarmasi boshlig`i o`rinbosari ham hisoblanadi.
Ma`lumot o`rnida, Prezidentning 2018 yil 13 apreldagi "O`zbekiston Respublikasi Adliya vazirligi faoliyatini yanada takomillashtirishga doir tashkiliy chora-tadbirlar to`g`risida"gi qarorida har bir viloyatda vazirlikning yuridik kollejlarini tashkil qilish nazarda tutilgan bo`lib, shu asosda Qarshi iqtisodiyot kolleji Qashqadaryo viloyat yuridik kollejiga aylantirildi. Viloyat adliya boshqarmasi boshlig`i lavozimi bo`yicha yuridik kolleji direktori hisoblanadi.
N.Nazarova oldingi ish joyida ham bir vaqtning o`zida ikki lavozimni bajarib kelgan.
