Markaziy saylov komissiyasining navbatdagi Videokonferensiyasida Moskva va Kvandju shaharlarida qo`shimcha saylov uchastkalarini tuzish, xorijdagi O`zbekiston fuqarolarining saylovga oid huquqlarini ta`minlash masalasi ko`rib chiqildi.
Saylov kodeksining 10-moddasiga muvofiq O`zbekiston Respublikasining chet davlatlardagi diplomatik va boshqa vakolatxonalari huzurida saylov uchastkalari tuzilishi Markaziy saylov komissiyasi tomonidan hal etilishi belgilab qo`yilgan.
Majlisda ma`lum qilinishicha, Tashqi mehnat migrasiyasi agentligining Moskva shahridagi vakolatxonasida 54-saylov uchastkasi va Kvandju shaharidagi vakolatxonasida 55-saylov uchastkasi tuziladi.
Moskva shahridagi 54-saylov uchastkasi O`zbekiston Respublikasi Oliy Majlisi Qonunchilik palatasi deputatlari saylovini o`tkazuvchi 145-Bodomzor saylov okrugiga, Kvandju shahridagi 55-saylov uchastkasi 146-Astrobod saylov okrugiga biriktirildi.
Koreyadagi Vatandoshlarimizning saylovda ovoz berish huquqlarini ta`minlash borasida amalga oshirilayotgan ishlar haqida O`zbekiston Respublikasining Koreya Respublikasidagi Favqulodda va muxtor elchisi Vitaliy Fen batafsil axborot berib o`tdi. Uning aytishicha Koreyadagi saylov uchastkalari soni bugungacha 1 ta bo`lib, u Seul shahrida joylashgan edi. Markaziy saylov komissiyasi bugungi yig`ilishida Kvandju shahrida ham 2-saylov uchastkasini ochish masalasi bo`yicha qaror qabul qilganligi Vatandoshlarimizning saylovlarda ishtirok etish imkoniyatlarini yanada kengaytiradi.