Avval xabar qilganimizdek, bugun Toshkentda Markaziy Osiyo davlatlari rahbarlarining ikkinchi Maslahat uchrashuvi bo`lib o`tmoqda.
Davlatimiz rahbari Markaziy Osiyoda ko`p tomonlama hamkorlik bo`yicha yagona nuqtai nazarni kelishish zarurligini ta`kidlab, uning asosiy yo`nalishlari haqida o`z fikrlarini bildirdi, qator muhim tashabbuslarni ilgari surdi.
Bu, avvalo, savdo-iqtisodiy va investisiyaviy aloqalarni rivojlantirishdir. Katta bozorga ega, tabiiy xomashyo va inson resurslari salmoqli bo`lgan mintaqamizning raqobatdosh ustunliklarini imkon qadar to`liq ishga solish muhim. Qo`shilgan qiymat zanjirini shakllantirish, mintaqa ichidagi savdoni kengaytirish, ish o`rinlarini yaratish maqsadida iqtisodiyotning turli tarmoqlarida yangi imkoniyatlarni aniqlash va kooperasiya loyihalarini amalga oshirish lozim.
O`zbekiston qishloq xo`jaligi mashinasozligi, avtomobilsozlik, elektrotexnika, to`qimachilik sanoati, agrar tarmoqda faol hamkorlik qilishga tayyor ekani bildirildi.
Prezidentimiz shu maqsadda Toshkentda Markaziy Osiyo mamlakatlari investisiyaviy forumini tashkil etish, savdo-sanoat palatalari rahbarlari uchrashuvlarini har yili o`tkazishni taklif qildi.
Ikkinchi muhim yo`nalish – mintaqaning transport jihatidan o`zaro bog`liqligini mustahkamlash va tranzit salohiyatini ro`yobga chiqarish.
Markaziy Osiyoning transport tizimi yaratilayotgan zamonaviy logistika infratuzilmasidan foydalangan holda mintaqa ichida uzluksiz kommunikasiyani ta`minlashi, shuningdek, tobora ortib borayotgan tranzit oqimlariga samarali xizmat qilishi lozimligi ta`kidlandi.
Transport kommunikasiyalari bo`yicha mintaqaviy kengash tuzilishini, Markaziy Osiyo transport tizimini birgalikda rivojlantirish bo`yicha dastur va bitimning kelishilishini tezlashtirish muhimligi qayd etildi.
Uchinchidan, mintaqamizning uzoq muddatli manfaatlarini hisobga olgan holda energetika sohasidagi hamkorlikni kengaytirish zarurligi, O`zbekiston qayta tiklanuvchi energiya manbalarining ulushini oshirish, zamonaviy energetika infratuzilmasini yaratish borasidagi qo`shma loyihalarni amalga oshirishga tayyor ekani ta`kidlandi.
Mamlakatlarimizning ulkan turizm salohiyatini amalga oshirish yana bir istiqbolli yo`nalishdir. Davlatimiz rahbari buning uchun Markaziy Osiyoning yagona, ko`pchilik taniydigan turizm brendi, mintaqa uchun umumiy bo`lgan jozibador turizm mahsulotlarini shakllantirish lozimligiga e`tibor qaratdi.
Shu maqsadda Prezidentimiz “Markaziy Osiyo bo`ylab sayohat” xalqaro turizm konferensiyasini o`tkazish taklifini bildirdi.
Shavkat Mirziyoev suvdan foydalanish borasidagi muammolarni hal etishga doir o`zaro kelishilgan yondashuvlarni ishlab chiqishni taklif etdi, Afg`onistonda tinchlik, milliy murosa va iqtisodiy tiklanishga erishishga ko`maklashish yo`lida mintaqa mamlakatlarining sa`y-harakatlarini muvofiqlashtirish muhim ekanini ta`kidladi.