Shanxaydagi shifokorlar koronavirusdan tuzalgan odamlarning qon plazmasidan (qon tarkibidagi modda) epidemiyaga chalingan bemorlarni davolashda foydalanishmoqda. Bu haqda tarjimon.uz ma`lumot bermoqda.
Bu o`zining dastlabki natijasini bermoqda, deya xabar beradi xitoylik professor dushanba kuni. Jahon Sog`liqni Saqlash Tashkilotining favqulodda vaziyatlar bo`yicha mutaxassisi ham bu usulning to`g`riligini ta`kidlagan.
Xubey viloyati poytaxti Uhan shahrida paydo bo`lgan koronavirus epidemiyasi shu paytgacha Xitoyda 1,770 kishining hayotiga zomin bo`ldi va 70 mingdan ortiq odam uni yuqtirib oldi.
17 fevralda berilgan ma`lumotlarga ko`ra, Xitoyning moliyaviy markazi bo`lgan Shanxayda virusga chalinganlar 332 tani tashkil etib, bir marta o`lim holati kuzatilgan. Shanxay jamoat sog`liqni saqlash markazining professori Lu Xanchjou 184 kishi karonavirus sabab kasalxonaga yotqizilganini va ulardan 166 nafari engil, 18 nafari og`ir ahvolda ekanligini aytdi.
Uning ma`lum qilishicha, kasalxonada plazma terapiya o`tkazish uchun maxsus klinikalar tashkil etilgan va qon topshirmoqchi bo`lgan ko`ngillilar tanlab olinmoqda. Donarlar gepatit B va C yoki shu kabi kasalliklarga chalinmaganini tekshirish uchun qon tekshiruvidan o`tkaziladi.
Ayni paytda yangi koronavirusga qarshi ishlatilishi mumkin bo`lgan muolajalar yoki vaksinalar mavjud emas. Dori vositalarini ishlab chiqish va ularni sinovdan o`tkazish jarayoni esa ko`p oylar va hatto yillarni talab qilishi mumkin.
