Olimjon Isaev Namangan shahar hokimi etib tayinlandi, deya xabar qildi viloyat hokimligi Matbuot xizmati.
Xalq deputatlari Namangan shahar kengashining navbatdan tashqari sessiyasi bo`lib o`tdi. Sessiya ishida Prezident maslahatchisining o`rinbosari Umar Ismoilov, viloyat hokimi Xayrullo Bozorov ishtirok etdi.
Sessiyada tashkiliy masala ko`rildi. Shu paytgacha “O`zagrokimyohimoya” aksiyadorlik jamiyati boshqaruvi raisi bo`lib ishlab kelgan Olimjon Isaev Namangan shahar hokimi etib tayinlandi.
Olimjon Isaev 1972 yili Namanganda tug`ilgan. Toshkent davlat agrar universiteti va Namangan davlat universitetini tamomlagan.
Namangan shahridagi “Ifoda agro kimyo himoya” korxonasi direktori, viloyat fermerlar kengashi raisi, “Mexmash” MChJ kuzatuv kengashi raisi vazifalarida ishlagan. 2018-yil may oyidan beri “O`zagrokimyohimoya” aksiyadorlik jamiyati boshqaruviga raislik qilib kelayotgandi.
Eslatib o`tamiz, Namangan shahrining sobiq hokimi Shavkatjon Abdurazzaqov kecha, 5-mart kuni Ekologiya va atrof-muhitni muhofaza qilish davlat qo`mitasi raisi lavozimiga tasdiqlandi.
