Majburiy ijro byurosi Farg`ona viloyati organlari tomonidan Vazirlar Mahkamasining 12.01.2018 yildagi 22-sonli qarori talablariga muvofiq tonggi soat 04-00dan boshlab tonggi reydlar o`tkazilmoqda, deya ma`lum qildi MIB Axborot xizmati.
Ma`lumki, Majburiy ijro byurosi O`zbekiston Respublikasining “Tezkor qidiruv faoliyat to`g`risida”gi Qonuniga ko`ra tezkor faoliyat bilan shug`ullanuvchi organlardan biri bo`lib hisoblanadi. Shu sababli, to`plangan tezkor ma`lumotlarga asosan navbatdagi tonggi reyd Farg`ona tumani, Do`stlik MFY, Haqiqat ko`chasida o`tkazildi.
Xususan, mazkur ko`chada yashovchi fuqaro Mamatqulov G`anijon o`z xonadoni tomorqasida bir nechta issiqxonalar qurib, ularga yashirin ravishda tabiiy gaz tarmog`ini tortgan va tadbir vaqtida hech qanday hisoblagichsiz foydalanib kelayotganligi aniqlandi. Holbuki, uning yon qo`shnilari tabiiy gaz bosimi pastligi sababli o`tin-ko`mirdan foydalanishmoqda ekan.
Birovning haqqi teshib chiqadi, degan naql to`g`ri bo`lib chiqdi. Issiqxona tabiiy gaz tarmog`idan uzildi, endi G`.Mamatqulov issiqxonalaridagi bir necha o`n minglab pomidor va boshqa ko`chatlarini tunu-kun o`tin va ko`mir yoqib asrab qolishiga to`g`ri keladi.
Mazkur holat bo`yicha Majburiy ijro byurosi Farg`ona viloyat boshqarmasi xodimlari tomonidan bayonnoma rasmiylashtirildi va hozirda surishtiruv harakatlari olib borilmoqda.
Davlatga etkazilgan zarar esa gaz ta`minoti korxonasi mutaxassislari tomonidan hisoblab berilganidan so`ng so`zsiz undiriladi.
