Oliy sudga har kuni ko`plab fuqarolar turli mazmundagi shikoyatlar bilan keladi. Ular orasida munis ayollarimiz ham bor, albatta.
Bugun, 6 mart kuni Oliy sud binosiga shikoyat bilan kelgan ayollarni Murojaatlar boshqarmasi xodimlari, Oliy sud rahbariyati, sudyalar gullar bilan qarshi oldi. Mayli-da, gap murojaatda emas, fuqaroning ayolligida, zero bayram arafasida xotin-qizlarga mehr ko`rsatish xalqimizga xos fazilatlardan biri. Shoir aytganidek, “...ayolga baxt bering, saodat bering. Oltmishga kirsa-da, yuzga kirsa-da.”
Qabulda bo`lgan ayollardan biri 81 yoshli Munavvarxon Abdullaeva Andijon shahridan kelgan. Ayani ikki firibgar erkak chuv tushirib, binosini o`ziniki qilib olgan. Fuqaro ishi bo`yicha Oliy sudning adolatli qaror chiqarib berishidan umidvor.
"Hayot ekan-da, qariganimda boshimga shunday ishlar tushdi. Oliy sud raisi o`rinbosari X.Yodgorov meni yaxshi kutib oldi. Hatto gul ham sovg`a qildi. Buni kutmagandim. Xursand bo`ldim. Ayolga ozgina mehr ham ko`ngilni ko`taradi-da", — deydi e`tibordan xursand bo`lgan onaxon.
Shu kuni Oliy sudga turli masalalarda shikoyat bilan kelgan fuqarolar — N.To`raeva, E.Shatunovskaya, M.Sodiqova va boshqa ayollar qabul qilinib, murojaatlari tinglandi, ularga ham gullar sovg`a qilindi. Murojaatlari qonun doirasida ko`rib chiqilishi yuzasidan tushuntirish berildi.
Bu o`ziga xos yondoshuvdan ayollar xursand bo`lishdi.
Z. Qo`ziboev, Oliy sud matbuot xizmati
katta konsultanti
