Toshkentda Bosh prokuratura va Vazirlar Mahkamasi binolari oldida bir guruh ayollar tomonidan janjal uyushtirildi. Bu haqda Bosh prokuratura rasmiy axborot berdi.
Keltirilishicha, joriy yilning 5 mart kuni Bosh prokuror N.Yo`ldoshev tomonidan videokonferensiya aloqa orqali 19 nafar fuqarolarning qabuli o`tkazilgan bo`lsada, 2020 yil 6 mart kuni G.Karimbekova, X.Ergasheva, G.Xujaxanova, D.Dultaeva va boshqa bir guruh ayollar Bosh prokuratura binosiga kirib, janjal uyushtirishgan va Bosh prokuror qabul qilishini so`ragan.
Bosh prokuror xizmat safarida bo`lganligi sababli ushbu fuqarolar Bosh prokurorning 1-o`rinbosari A.Xolmaxmatov tomonidan qabul qilingan.
Bundan tashqari, G.Karimbekova, D.Dultaeva va boshqa bir guruh fuqarolar 2020 yil 4 mart kuni ham O`zbekiston Respublikasi Vazirlar Mahkamasining fuqarolarni qabulxonasida janjal uyushtirganligi uchun Bosh prokurorning 1-o`rinbosari A.Xolmaxmatov tomonidan shaxsan qabul qilingan.
Ushbu fuqarolar bir necha marotoba Bosh prokuror va Bosh prokuror o`rinbosarlari qabulida bo`lib, murojaatlari belgilangan tartibda ko`rib chiqilgan va yozma javob xatlari berilgan.
Mazkur fuqarolar doimiy ravishda Bosh prokuratura, Oliy Majlis Senati, Vazirlar Mahkamasi va boshqa idoralarda tartibsizliklar uyushtirib, noqonuniy talablari bilan e`tiborni o`zlariga jalb qilib kelishmoqda, deyilgan rasmiy axborotda.