Shu kecha-kunduzda ijtimoiy tarmoqlarda Mening Yurtim kanalining «Markaziy studiya» dasturida “Endi ta`lim muassasasiga o`quvchilar maktab formasida kelishi shart emas. Buning uchun 2,23 mln. so`m to`lanishi kifoya” mazmunidagi lavha keng tarqalmoqda.
(yaqin daqiqalarda shu erga xabar e`lon qilingan lavha joylanadi)
Ushbu xabar tez fursatda keng muhokamalarga sabab bo`ldi va bo`lmoqda. Shu munosabat bilan Xalq ta`limi vazirligi hamda Oliy va o`rta maxsus ta`lim vazirligi ushbu xabarlarga tezkor munosabat bildirdi:
“Xalq ta`limi vazirligi mazkur xabarlar noto`g`ri ekanligini ma`lum qiladi. Vazirlikning bunday “tashabbus” haqida xabari yo`q.
Eslatib o`tamiz, O`zbekiston Respublikasi Vazirlar Mahkamasining 2018 yil 15 avgustdagi “Davlat umumiy o`rta ta`lim muassasalari o`quvchilarini zamonaviy maktab formasi bilan ta`minlash chora-tadbirlari to`g`risida”gi 666-sonli qarori bilan davlat umumiy o`rta ta`lim muassasalari o`quvchilari uchun zamonaviy yagona maktab formasini joriy etish tartibi to`g`risidagi Nizom tasdiqlangan bo`lib, mazkur Nizomda o`quvchining tashqi ko`rinishiga bo`lgan talablar keltirib o`tilgan.
Barcha ota-onalar va ularning o`rnini bosuvchi shaxslar o`quv yili boshida ushbu talablar bilan tanishtirilib, o`quv yili davomida o`z farzandining Nizom talablariga mos ravishda umumta`lim maktablariga kelishini ta`minlashga mas`ul hisoblanadi”, — deyiladi XTV Matbuot xizmati rasmiy xabarida.
“Mening Yurtim” telekanali «Markaziy studiya» dasturi ijodkorlari tomonidan tayyorlangan “Pulini to`lab qo`yib, o`qishga formasiz borish mumkinmi?" mazmunidagi lavha ijtimoiy tarmoqlarda turli talqinlarni keltirib chiqardi.
Oliy va o`rta maxsus ta`lim vazirligi ushbu xabarlar noto`g`ri ekanligini rasman ma`lum qiladi. Vazirlik tizimda talaba va o`quvchilarning kiyinishi bo`yicha bunday g`ayriqonuniy tartib-qoidalar o`rnatilishga yo`l qo`ymaydi", — deya javob berilgan Oliy va o`rta maxsus ta`lim vazirligi Matbuot xizmati taqdim etgan rasmiy xabarda.
