Шу кеча-кундузда ижтимоий тармоқларда Mening Yurtim каналининг «Марказий студия» дастурида “Энди таълим муассасасига ўқувчилар мактаб формасида келиши шарт эмас. Бунинг учун 2,23 млн. сўм тўланиши кифоя” мазмунидаги лавҳа кенг тарқалмоқда.
Ушбу хабар тез фурсатда кенг муҳокамаларга сабаб бўлди ва бўлмоқда. Шу муносабат билан Халқ таълими вазирлиги ҳамда Олий ва ўрта махсус таълим вазирлиги ушбу хабарларга тезкор муносабат билдирди:
“Халқ таълими вазирлиги мазкур хабарлар нотўғри эканлигини маълум қилади. Вазирликнинг бундай “ташаббус” ҳақида хабари йўқ.
Эслатиб ўтамиз, Ўзбекистон Республикаси Вазирлар Маҳкамасининг 2018 йил 15 августдаги “Давлат умумий ўрта таълим муассасалари ўқувчиларини замонавий мактаб формаси билан таъминлаш чора-тадбирлари тўғрисида”ги 666-сонли қарори билан давлат умумий ўрта таълим муассасалари ўқувчилари учун замонавий ягона мактаб формасини жорий этиш тартиби тўғрисидаги Низом тасдиқланган бўлиб, мазкур Низомда ўқувчининг ташқи кўринишига бўлган талаблар келтириб ўтилган.
Барча ота-оналар ва уларнинг ўрнини босувчи шахслар ўқув йили бошида ушбу талаблар билан таништирилиб, ўқув йили давомида ўз фарзандининг Низом талабларига мос равишда умумтаълим мактабларига келишини таъминлашга масъул ҳисобланади”, — дейилади ХТВ Матбуот хизмати расмий хабарида.
“Mening Yurtim” телеканали «Марказий студия» дастури ижодкорлари томонидан тайёрланган “Пулини тўлаб қўйиб, ўқишга формасиз бориш мумкинми?" мазмунидаги лавҳа ижтимоий тармоқларда турли талқинларни келтириб чиқарди.
Олий ва ўрта махсус таълим вазирлиги ушбу хабарлар нотўғри эканлигини расман маълум қилади. Вазирлик тизимда талаба ва ўқувчиларнинг кийиниши бўйича бундай ғайриқонуний тартиб-қоидалар ўрнатилишга йўл қўймайди", — дея жавоб берилган Олий ва ўрта махсус таълим вазирлиги Матбуот хизмати тақдим этган расмий хабарда.
