Samarqand shahridagi Afrosiyob tepaligi yonidan oqib o`tuvchi kanalga 8 mart kuni tushib ketgan 3 yoshli bola FVV qutqaruv guruhi tomonidan qidirilmoqda. Bu haqda STV kanalida xabar berildi.
Qutqaruvchilarning aytishicha, suv oqimining tezligi va suvning toza emasligi ularning ishini qiyinlashtirmoqda.
“Dastlab ushbu hodisa haqida 10-50 qisqa raqamiga 8 mart kuni soat 10:30larda xabar kelib tushgan. Zudlik bilan qutqaruv otryadi voqea joyiga etib kelgan. Biroq suvning shox-shabalar bilan to`lganligi, pastki qismda oqimning tezligi sabab, bittalab sekin tekshirib borishga majbur bo`lyapmiz” — deydi Qutqaruv otryadi xodimi.
Biroq tushib ketgan 3 yoshli bolaning yaqinlari qutqaruvchilar harakatidan norozi.
“Bular yarim soatda etib keldik deyapti. Ammo 2 soatlarda kelishgan. 2-3 kishi kelishdi. Chuqurroq bo`lgan joylarga kirib ko`rilar, desam, “kirmaymiz” deyishyapti. Unda nega kelishgan, nima ish qilishadi o`zi bular?” — deydi bolachaning bobosi. Ayni paytga qadar ham boladan xech qanday xabar yo`q. Bolaning yaqinlari ma`lum muddatga suv yo`lini to`sib, tezligini pasaytirib turishni, xech bo`lmasa farzandlarining jasadini bo`lsa ham topishlari kerakligini bildirishmoqda. Ular buning uchun bir qancha tashkilotlarga murojaat qilishgan.