Jahon sog`liqni saqlash tashkilotining O`zbekistondagi vakolatxonasi rahbari Lianne Kuppens «O`zbekistonga koronavirusning kirib kelish ehtimoli yuqori ekanini ta`kidladi. Bu haqda Tashqi ishlar vazirligining «Dunyo» axborot agentligi xabar berdi.
JSST vakili ayni vaqtda O`zbekistondagi aholi vakillarida koronavirusga chalinish holatlari aniqlanmaganini qayd etgan.
«Biroq, virus yuqumli va 6 ta qit`ani zararlagani sababli, uning yaqin vaqt ichida O`zbekistonga kirib kelishi ehtimoli yuqori», – deya ta`kidlagan JSST vakili.
Kuppens o`zbekistonliklarni JSST tomonidan berilgan tavsiyalarga, tozalik va gigienaga rioya qilishga, biroq, vahimaga tushmaslikka chaqirmoqda:
«Biz koronavirusning oldini olishda faol bo`lishimiz lozim», – deya ogohlantirmoqda Kuppens.
Uning aytishicha, dunyodagi birorta davlat, hatto eng rivojlangan mamlakat ham koronavirus oqibatlariga to`liq tayyor bo`la olmaydi. JSST bu borada O`zbekistonga monitoring qilishda, kasallikni erta bosqichida aniqlashda, tashxis qo`yish imkoniyatlarini kengaytirishda, tibbiy muassasalarni izolyasiya qilish va bu borada tibbiyot xodimlarining bilim hamda salohiyatini oshirishda yordam bermoqda.
O`zbekiston zarur choralarni ko`rishi lozim va bu yo`nalishda ishlar faol ravishda olib borilmoqda.
Kuppens O`zbekiston JSSTning barcha tavsiyalariga amal qilayotganini qayd etdi.