Prezidentimiz tashabbusi bilan qo`shni Qirg`iziston Respublikasiga koronavirus “COVID-19” kasalligini bartaraf etishga ko`maklashish maqsadida insonparvarlik yordami yuborildi. Bu haqda O`zA xabar qildi.
Keyingi yillarda mamlakatlarimiz o`rtasidagi siyosiy, savdo-iqtisodiy, transport-kommunikasiya, bank-moliya, fan-texnika, sanoat, qishloq va suv xo`jaligi, turizm va boshqa sohalardagi hamkorlik rivojlanib bormoqda.
Ikki mamlakat Prezidentlarining qat`iy irodasi va azmu shifoati tufayli o`zaro savdo-iqtisodiy hamkorlik sezilarli o`smoqda. Mazkur insonparvarlik yordami ham azaliy do`stlikning amaldagi ifodasidir.
“O`zbekiston xalqidan Qirg`iziston xalqiga insonparvarlik yordami” shiori ostida tashkil etilgan insonparvarlik yordami O`zbekiston Respublikasi Favqulodda vaziyatlar vazirligi, Andijon viloyati hokimligi, “O`zbekiston temir yo`llari” AJ, “O`zdonmahsulot” aksiyadorlik kompaniyasi tasarrufidagi “Qo`rg`ontepa don mahsulotlari” aksiyadorlik jamiyati hamda mamlakatimizdagi farmasevtika korxonalari hamkorligida amalga oshirildi.
Andijon viloyati Qo`rg`ontepa tumanidagi temiryo`l stansiyasidan ming tonna un, turli oziq-ovqat mahsulotlari, shuningdek, koronavirus infeksiyasi tarqalishining oldini olishda foydalaniladigan bir martalik bosh kiyimli himoya kombinzoni, respirator, qo`lqop, himoya ko`zoynagi, pirometr hamda test-sistemalar ortilgan poezd qo`shni respublikaga jo`natildi.
– Ayni kunda koronavirus pandemiyasi dunyoning barcha xalqlarini jiddiy tashvishga solmoqda, – deydi “Qo`rg`ontepa don mahsulotlari” korxonasi rahbari Shodilbek Mamajalilov. – Pandemiya ko`plab davlatlar iqtisodiyotini izdan chiqarib yubordi. Ana shunday paytda bir birini qo`llab-quvvatlash muhim ahamiyat kasb etadi. Prezidentimiz tashabbusi bilan yuborilayotgan insonparvarlik yordami ham asrlar davomida xalqimiz bilan hamjihat bo`lib yashab kelayotgan qardosh, qo`shni qirg`iz xalqiga og`ir bir sharoitda, qolaversa, koronavirus infeksiyasini bartaraf etishda katta yordam bo`ladi.
Insonparvarlik yordami ortilgan maxsus eshelon Qirg`izistonning O`sh shahriga yo`l oldi.