Namangan viloyati hokimi Xayrullo Bozorov viloyat xalqiga yana bir bor murojaat bilan chiqdi.
Uning murojaatida qayd etilishicha, oxirgi uch kun ichida koronavirus infeksiyasini yuqtirgan, manbasi aniq bo`lmagan oltita holat aniqlangan. Ushbu fuqarolar bu kasallikni qachon va kimdan yuqtirib olganini bilishmaydi ham. Ayrim fuqarolar uylarida isitmalab, buni oddiy shamollash deb o`ylab, o`zlarini uy sharoitida davolashga uringan.
Ma`lum qilinishicha, so`nggi aniqlangan to`rtta holatning uchtasi Namangan shahrida, bittasi esa Uchqo`rg`on tumanida yuz bergan.
"Ular bir necha kunlab, o`n kunlab uylarida isitmalab yotishlari, o`z vaqtida shifokorlarga murojaat etmaganliklari bugun ushbu kasallikning yuqish xavfini oshirib yubormoqda. Mazkur 4 nafar fuqaroning ikki nafari og`ir ahvolda, sun`iy nafas oldiradigan apparatlarga ulangan.
Agar ular o`z vaqtida shifokorlarga murojaat qilganlarida, o`z vaqtida aniq diagnoz qo`yilardi, yaqin qarindoshlariga yuqtirilmas edi. Bugun ularning har biri orqasidan 200 tadan mingtagacha odamni karantinga olishga hojat bo`lmas edi. Koronavirus yuqtirganlar oramizda yuribdi, ular kimlar, soni qancha, afsuski, biz bilmaymiz”, dedi viloyat rahbari.
(yaqin daqiqalarda shu erga Namangan viloyati hokimining murojaati aks etgan video joylanadi)
Eslatib o`tamiz, Xayrulla Bozorov bundan avval ham xalqqa murojaat bilan chiqish qilib, koronavirusdan vafot etgan namanganlik 72 yoshli ayol xususida achinish bilan gapirgandi.
Eslatib o`tamiz, bugun, 13 aprel soat 06:00 dan boshlab Namangan shahri va Uchqo`rg`on tumani, shu jumladan, “Qayqi” qishlog`i hududida barcha turdagi shaxsiy va xizmat avtotransport vositalari, mototransport (skuter), velosiped hamda fuqarolarning harakatlanishi butunlay to`xtatildi.
