Kecha ijtimoiy tarmoqlarda «Xushxabar! Qabul kvotalari tasdiqlandi!» degan xabarlar tarqaldi va unga Pdf faylni ilova qilishmoqda. Xo`sh, bu xabarlar qanchalik rost? Bu kabi savollarga huquqshunos bloger Xushnudbek o`z kanalida javob berdi. Jumladan u shunday deydi:
Abiturientlar, o`zi umuman yoshlarimiz juda sodda. Nimani ko`rsa, o`qisa, shunga ishonib ketaveradi. Ozgina o`ylab, tahlil qilib, sinchiklab qarab o`tirmaydi, hovliqqanicha bir-biriga tarqatadi, yolg`on xabarlarga o`zi ishongani etmaganday, birovlarni ham ishontirishga harakat qiladi.
Kechagi tarqatilgan Pdf faylning tepasiga katta qilib «LOYIHA» deb yozib qo`yilgan. Boz ustiga u normativ hujjatlar loyihasi muhokama qilinadigan portaldan olingani ko`rinib turibdi (ko`pchilik bunaqa portal borligini bilmasa ham kerak). Ozgina e`tiborli bo`lgan odam, bu rasmiy qaror emasligini tushunib olishi qiyin emas.
Gap shundaki, bu 18 mart kuni muhokama qilish uchun e`lon qilingan Prezident qarori loyihasi edi. 1 oy oldin chiqqan loyihani "rasmiy" deb tarqatish kimga kerak bo`lib qoldi ekan, hayronman.
Hozircha qabul kvotalari tasdiqlangani yo`q, bu haqda hech qanday rasmiy xabarlar berilmadi. Olgan ma`lumotlarimizga ko`ra, u hali loyiha ko`rinishida va tegishli tashkilotlar tomonidan muhokama qilinmoqda. Agar rasmiy va ishonchli manbalarni kuzatib borsangiz, Prezident qarorga imzo qo`ygach, albatta e`lon qilinadi.
Ayrim kanallar tushunmasdan tarqatayotgan kvotalarga ishonib qolmang, rasmiy qarorda butunlay boshqacha bo`lishi ham mumkin.
Hurmatli, yoshlar, biror ishonchsizroq joyda qandaydir xabarni o`qib qolsangiz, darrov vahimaga tushmang, hovliqmang, ishonib qolmang, o`zgalarga tarqatishga shoshilmang. Detallariga sinchiklab nazar tashlang. Rasmiy va ishonchli manbalar orqali tekshirib ko`ring.
Har biringizda ichki antivirus bo`lsin, har bir o`qigan ma`lumotingizni o`sha antivirus orqali avval yaxshilab tekshirib, keyin hazm qiling", deyiladi ushbu munosabatda.
