AVTOMOBIL XARIDIDA QAY USUL AFZAL: BOZORMI, AVTOSALONMI YoKI AVTOKREDIT? (to`liq)

Anchadan beri mashina olaman deb pul yig`ib yuraman, bugun salonlardan ham bozordan ham avtomobil harid qilish mumkin. Avtomobilni qaerdan olishni bilmay boshim qotyapti. Kelgusi sonlaringizda avtomobillarning narxlari, qaerdan harid qilish afzalligi hamda avtokredit haqida batafsil ma`lumot bersangiz?

Z.Sultonov, Toshkent sh.

Bugungi kunda GM Uzbekistan avtomobillari kreditga ham lizingga ham sotilmaydi. GM Uzbekistan avtomobillarini rasmiy dillerlardan hozircha jismoniy shaxslar naqd, yuridik shaxslar esa pul ko`chirish yo`li bilan harid qilishlari mumkin. Biroq O`zbekistonda avtomobillarni harid qilishning boshqa yo`llari bor. Bu haqda quyida batafsil aytib beramiz. Hozircha esa avtomobillarning avtosalonlardagi va bozorlardagi narxlari bilan tanishtirmoqchimiz.

Bozorlarda narx qanday?

Mazkur maqolani yozish maqsadida poytaxtimizdagi avtomobil bozoridagi narxlar bilan qiziqib ko`rdik. Ma`lumotlarga ko`ra bugun avtomobil narxlari 15-20% tushgan. 

Matiz - 4500 – 8000 u.e.gacha

Spark – 6700 – 13200 u.e.gacha

Nexia – 6000 – 10 000 u.e.gacha

Cobalt – 9000 - 16 000 u.e.gacha

Lacetti – 10000 – 14000 u.e.gacha

Malibu - 17 000- 23000 u.e.gacha

*mazkur narxlar avtobor.uz, olx.uz saytlaridan olingan. Ushbu narxlar avtomobilning holatiga qarab, chiqarilgan muddati va bosgan masofasiga qarab farqlanadi.

AVTOSALONDAGI NARXLAR

QISMAN TO`LOV, LIZING YoKI AVTOKREDIT ASOSIDA!

Siz avtomobil sotib olishni orzu qilasiz, ammo bunga pulingiz etmayapti? Yurtimizda aholiga ana shunday imkoniyatlarni taqdim etayotgan kompaniyalar faoliyat yuritmoqda. Ularning yordamida orzuingiz haqiqatga aylanishi mumkin.

Ular moliyalashtirishning 2 turini taklif etishmoqda:

1. AVTOKREDIT – yillik 19% dan 22%.
2. LIZING – yillik 15%

Kredit

Mazkur sohaga ixtisoslashgan kompaniyalar tijorat banklari bilan birgalikda aholiga tez va xavfsiz avtokreditni taqdim etishmoqda. Nega buncha tez? Sababi hujjatlarni topshirib, sizga kerakli avtomobilni rasmiylashtirish uchun 3 kungacha vaqt talab etiladi. Nima sababdan xavfsiz? Sababi siz har qanday xatardan holi bo`lasiz, avtomobil boshidan sizning nomingizga rasmiylashtiriladi! 
Shartlari

Oldindan to`lov avtomobil narxidan 25% tashkil qiladi, yillik foiz to`lovi 19-22% (bu esa oldindan amalga oshirgan summangizga qarab belgilanadi).Kredit muddati 36 oy. 
Qanday hujjatlar kerak?

• Pasport;
• INN;
• Yashash joyidan ma`lumotnoma;
• Daromadingiz to`g`risida ma`lumotnoma (ohirgi 12 oy uchun).

Avtokredit ikkilamchi bozordan harid qilingan avtomobil uchun beriladi. Avtomobil narxi uni egasi tomonidan belgilanadi. To`lovlar so`mda amalga oshiriladi.

Lizing asosida

Bugungi kunda avtomobillarni lizing vositasida taqdim etadigan kompaniyalar yurtimizdagi yirik lizing kompaniyalari bilan hamkorlik qilishadi. Bunday holda avtomobil lizing kompaniyasi nomiga rasmiylashtirilib, siz bilan notarial lizing shartnomasi imzolanadi.
Shartlari qanday?

Bunda yillik foiz to`lovi 15% tashkil qiladi. Zayom 13 dan 36 oygacha bo`lgan muddatga taqdim etiladi.
Buning uchun avtomobilning 35% to`lovini oldindan amalga oshirish lozim.

Lizing 12 oydan ko`proq faoliyat yuritgan yuridik firmaga taqdim etiladi.

Lizingga avtomobillar birlamchi bozor, ya`ni avtosalonlardan rasmiylashtirilishi mumkin.

PLYuS VA MINUSLARI NIMADA?

Avtosalondan naqd pulga yoki kreditga xarid qilinadigan avtolarning qanday plyus va minuslari:

AVTOSALON

Plyus: Yap-yangi, hech kim haydamagan avtomobilni harid qilasiz.

Minus: Aksariyat hollarda uni bir necha oy muddat navbatda turib kutishingizga to`g`ri keladi.

AVTOKREDIT

Plyus: Avtomobilni harid qilgan zahotingiz haydaysiz, pulni birdaniga to`lamaysiz, bo`lib-bo`lib har oy to`laysiz.

Minusi: Foizlari bilan avtomobil asl narxidan qimmaroqqa tushadi.

Mavzuga oid

Avtosalondan mashina olishda biror muammoga duch kelgan taqdirda kimga murojaat qilish mumkin?

Bunday hollarda Toshkent shahri, Nukus ko`chasi 8 uyda joylashgan GM-Uzbekistan kompaniyasining bosh ofisiga yoxud kompaniyaning (0 371) 141 7777 raqamiga qo`ng`iroq qilib oydinlik kiriting.

• Yoz qaynoq pallada

AVTOMOBILNI ISSIQDAN HIMOYa QILAMIZ

Issiq havo nafaqat odamlarga salbiy ta`sir qiladi. Bunda avtomobilning tashqi ko`rinishi va saloni ham xavf ostida qoladi. Xo`sh bunday hollarda qanday yo`l tutish mumkin?

Mashinadagi eng nozik narsa bu— oynalari. Oynalarni himoyalashga sizga maxsus «quyosh to`siqlari» yordam beradi. Ular old oyna uchun kumush panel ko`rinishida bo`ladi. Uning rangi va tuzilishi quyosh nurini qaytarishga qodir bo`ladi. Huddi shunday narsalarni yon oynalariga ham osgan foydadan holi bo`lmaydi.

Agar... sizda avtomobilingiz avtomatik ravishda o`t oldirish tizimi mavjud bo`lsa, uni vaqti vaqti bilan kondisionerni ishlatishga dasturlang. Shunda salon vaqti vaqti bilan sovub turadi.

Issiq...mashinangizning bo`yoqlariga zarar etkazishi mumkin. Qizil, ko`k, sariq va boshqa yorqin rangdagi avtomobillar quyosh nuri yordamida tezroq sarg`ayadi. Darvoqe, qora rangdagi avtomobilllar issiqdan oqlardan ko`ra tezroq «aqldan ozishadi».

Quyosh, uy va boshqa katta mashinalarning soyalarida to`xtaganingiz maqsadga muvofiq. Mashinangizni garajda saqlash imkoniyati bo`lsa undan albatta foydalaning, shunda bu kabi qiyinchiliklardan biroz himoyalanishingiz mumkin.

Yozda...avtomobilingizni ichini toza holda saqlashga harakat qiling. Toza qoplama avtomobilni quyosh qaytarishi yordamida himoyalashga qodir bo`ladi. Shuningdek avtomobilingizni quritib arting: suv tomchilari tashqi ko`rinishni buzilishini tezlashtirishadi.

Laylo RUSTAMOVA tayyorladi