АВТОМОБИЛ ХАРИДИДА ҚАЙ УСУЛ АФЗАЛ: БОЗОРМИ, АВТОСАЛОНМИ ЁКИ АВТОКРЕДИТ? (тўлиқ)

Анчадан бери машина оламан деб пул йиғиб юраман, бугун салонлардан ҳам бозордан ҳам автомобиль ҳарид қилиш мумкин. Автомобилни қаердан олишни билмай бошим қотяпти. Келгуси сонларингизда автомобилларнинг нархлари, қаердан ҳарид қилиш афзаллиги ҳамда автокредит ҳақида батафсил маълумот берсангиз?

З.Султонов, Тошкент ш.

Бугунги кунда GM Uzbekistan автомобиллари кредитга ҳам лизингга ҳам сотилмайди. GM Uzbekistan автомобилларини расмий диллерлардан ҳозирча жисмоний шахслар нақд, юридик шахслар эса пул кўчириш йўли билан ҳарид қилишлари мумкин. Бироқ Ўзбекистонда автомобилларни ҳарид қилишнинг бошқа йўллари бор. Бу ҳақда қуйида батафсил айтиб берамиз. Ҳозирча эса автомобилларнинг автосалонлардаги ва бозорлардаги нархлари билан таништирмоқчимиз.

Бозорларда нарх қандай?

Мазкур мақолани ёзиш мақсадида пойтахтимиздаги автомобиль бозоридаги нархлар билан қизиқиб кўрдик. Маълумотларга кўра бугун автомобиль нархлари 15-20% тушган. 

Матиз - 4500 – 8000 у.е.гача

Спарк – 6700 – 13200 у.е.гача

Nexia – 6000 – 10 000 у.е.гача

Cobalt – 9000 - 16 000 у.е.гача

Lacetti – 10000 – 14000 у.е.гача

Malibu - 17 000- 23000 у.е.гача

*мазкур нархлар avtobor.uz, olx.uz сайтларидан олинган. Ушбу нархлар автомобилнинг ҳолатига қараб, чиқарилган муддати ва босган масофасига қараб фарқланади.

АВТОСАЛОНДАГИ НАРХЛАР

ҚИСМАН ТЎЛОВ, ЛИЗИНГ ЁКИ АВТОКРЕДИТ АСОСИДА!

Сиз автомобил сотиб олишни орзу қиласиз, аммо бунга пулингиз етмаяпти? Юртимизда аҳолига ана шундай имкониятларни тақдим этаётган компаниялар фаолият юритмоқда. Уларнинг ёрдамида орзуингиз ҳақиқатга айланиши мумкин.

Улар молиялаштиришнинг 2 турини таклиф этишмоқда:

1. АВТОКРЕДИТ – йиллик 19% дан 22%.
2. ЛИЗИНГ – йиллик 15%

Кредит

Мазкур соҳага ихтисослашган компаниялар тижорат банклари билан биргаликда аҳолига тез ва хавфсиз автокредитни тақдим этишмоқда. Нега бунча тез? Сабаби ҳужжатларни топшириб, сизга керакли автомобильни расмийлаштириш учун 3 кунгача вақт талаб этилади. Нима сабабдан хавфсиз? Сабаби сиз ҳар қандай хатардан ҳоли бўласиз, автомобиль бошидан сизнинг номингизга расмийлаштирилади! 
Шартлари

Олдиндан тўлов автомобиль нархидан 25% ташкил қилади, йиллик фоиз тўлови 19-22% (бу эса олдиндан амалга оширган суммангизга қараб белгиланади).Кредит муддати 36 ой. 
Қандай ҳужжатлар керак?

• Паспорт;
• ИНН;
• Яшаш жойидан маълумотнома;
• Даромадингиз тўғрисида маълумотнома (оҳирги 12 ой учун).

Автокредит иккиламчи бозордан ҳарид қилинган автомобиль учун берилади. Автомобиль нархи уни эгаси томонидан белгиланади. Тўловлар сўмда амалга оширилади.

Лизинг асосида

Бугунги кунда автомобилларни лизинг воситасида тақдим этадиган компаниялар юртимиздаги йирик лизинг компаниялари билан ҳамкорлик қилишади. Бундай ҳолда автомобиль лизинг компанияси номига расмийлаштирилиб, сиз билан нотариал лизинг шартномаси имзоланади.
Шартлари қандай?

Бунда йиллик фоиз тўлови 15% ташкил қилади. Заём 13 дан 36 ойгача бўлган муддатга тақдим этилади.
Бунинг учун автомобилнинг 35% тўловини олдиндан амалга ошириш лозим.

Лизинг 12 ойдан кўпроқ фаолият юритган юридик фирмага тақдим этилади.

Лизингга автомобиллар бирламчи бозор, яъни автосалонлардан расмийлаштирилиши мумкин.

ПЛЮС ВА МИНУСЛАРИ НИМАДА?

Автосалондан нақд пулга ёки кредитга харид қилинадиган автоларнинг қандай плюс ва минуслари:

АВТОСАЛОН

Плюс: Яп-янги, ҳеч ким ҳайдамаган автомобилни ҳарид қиласиз.

Минус: Аксарият ҳолларда уни бир неча ой муддат навбатда туриб кутишингизга тўғри келади.

АВТОКРЕДИТ

Плюс: Автомобилни ҳарид қилган заҳотингиз ҳайдайсиз, пулни бирданига тўламайсиз, бўлиб-бўлиб ҳар ой тўлайсиз.

Минуси: Фоизлари билан автомобиль асл нархидан қиммароққа тушади.

Мавзуга оид

Автосалондан машина олишда бирор муаммога дуч келган тақдирда кимга мурожаат қилиш мумкин?

Бундай ҳолларда Тошкент шаҳри, Нукус кўчаси 8 уйда жойлашган GM-Uzbekistan компаниясининг бош офисига ёхуд компаниянинг (0 371) 141 7777 рақамига қўнғироқ қилиб ойдинлик киритинг.

• Ёз қайноқ паллада

АВТОМОБИЛНИ ИССИҚДАН ҲИМОЯ ҚИЛАМИЗ

Иссиқ ҳаво нафақат одамларга салбий таъсир қилади. Бунда автомобилнинг ташқи кўриниши ва салони ҳам хавф остида қолади. Хўш бундай ҳолларда қандай йўл тутиш мумкин?

Машинадаги энг нозик нарса бу— ойналари. Ойналарни ҳимоялашга сизга махсус «қуёш тўсиқлари» ёрдам беради. Улар олд ойна учун кумуш панель кўринишида бўлади. Унинг ранги ва тузилиши қуёш нурини қайтаришга қодир бўлади. Ҳудди шундай нарсаларни ён ойналарига ҳам осган фойдадан ҳоли бўлмайди.

Агар... сизда автомобилингиз автоматик равишда ўт олдириш тизими мавжуд бўлса, уни вақти вақти билан кондиционерни ишлатишга дастурланг. Шунда салон вақти вақти билан совуб туради.

Иссиқ...машинангизнинг бўёқларига зарар етказиши мумкин. Қизил, кўк, сариқ ва бошқа ёрқин рангдаги автомобиллар қуёш нури ёрдамида тезроқ сарғаяди. Дарвоқе, қора рангдаги автомобилллар иссиқдан оқлардан кўра тезроқ «ақлдан озишади».

Қуёш, уй ва бошқа катта машиналарнинг сояларида тўхтаганингиз мақсадга мувофиқ. Машинангизни гаражда сақлаш имконияти бўлса ундан албатта фойдаланинг, шунда бу каби қийинчиликлардан бироз ҳимояланишингиз мумкин.

Ёзда...автомобилингизни ичини тоза ҳолда сақлашга ҳаракат қилинг. Тоза қоплама автомобилни қуёш қайтариши ёрдамида ҳимоялашга қодир бўлади. Шунингдек автомобилингизни қуритиб артинг: сув томчилари ташқи кўринишни бузилишини тезлаштиришади.

Лайло РУСТАМОВА тайёрлади