Bir oylik harbiy xizmat: to`lovlar, shartlar va tartiblardan xabardor bo`ling!

“Mening o`g`lim davlat tashkilotida ishlaydi. Yaqinda unga safarbarlik chaqiruvi rezervidagi harbiy xizmatni o`tash uchun chaqiruv qog`ozi keldi. Ayting-chi, agar o`g`lim safarbarlik chaqiruvi rezervidagi harbiy xizmatni o`taydigan bo`lsa, uning ish joyi va oylik maoshi saqlanadimi?”

N.Sh. Toshkent sh.

Ma`lumki, yurtimizda qonunchilikka asosan muddatli harbiy xizmat, safarbarlik chaqiruvi rezervidagi harbiy xizmat, kontrakt bo`yicha harbiy xizmat, O`zbekiston Respublikasi Qurolli Kuchlari safida harbiy xizmatni o`tagan rezervchilar xizmatini o`tash belgilangan. Qonunchilikda belgilangan va sanab o`tilgan to`rt turdagi harbiy xizmat orasidan aynan safarbarlik chaqiruvi rezervidagi harbiy xizmatni o`tash borasida mushtariylar yuqoridagi kabi so`rovlar bilan tahririyatga ham murojaat qilishmoqda. Mavzu yuzasidan yuqoridagi kabi savollarga javob olish uchun O`zbekiston Respublikasi Mudofaa vazirligi bo`lim boshlig`i Husniddin SAIDOVGA murojaat qildik.

QAChON VA KIMLAR ChAQIRILADI?

Fuqarolarning safarbarlik chaqiruvi rezervidagi xizmatga chaqirilishi O`zbekiston Respublikasi Prezidentining qaroriga asosan yiliga bir marta — fevral-mart oylarida o`tkaziladi. Muddatli harbiy xizmatni o`tashga yaroqli hamda chaqirilish muddatini kechiktirish va chaqirilishdan ozod etilish huquqiga ega bo`lmagan, biroq Qurolli Kuchlar safiga navbatdagi muddatga chaqirilmagan shaxslar safarbarlik chaqiruvi rezervi safiga olinadilar.

QANDAY TAShKIL ETILADI?

• Fuqarolarning safarbarlik chaqiruvi rezervidagi xizmati O`zbekiston Respublikasi Vazirlar Mahkamasining 2003 yil 22 fevraldagi 99-sonli “O`zbekiston Respublikasi fuqarolarining safarbarlik chaqiruv rezervidagi xizmatini tashkil etish chora-tadbirlari to`g`risida”gi Qarori bilan tasdiqlangan “O`zbekiston Respublikasi fuqarolarining safarbarlik chaqiruvi rezervida xizmatni o`tash tartibi to`g`risida Nizom”ga muvofiq tashkil qilinadi va amalga oshiriladi.

Safarbarlik chaqiruvi rezervidagi xizmat hududiy prinsip asosida oylik yig`inlar tarzida tashkil etiladi hamda chaqiriluvchilar tomonidan O`zbekiston Respublikasi Moliya vazirligining maxsus hisob varag`iga pul badallari kiritilishini nazarda tutadi.

ESLATIB O`TAMIZ:

Safarbarlik chaqiruvi rezervidagi xizmatni o`tagan fuqarolar 27 yoshga to`lganlaridan keyin Qurolli Kuchlar rezervi tarkibiga o`tkaziladilar.

ISh JOYI VA MAOShI SAQLANADIMI?

— “Umumiy harbiy majburiyat va harbiy xizmat to`g`risida”gi O`zbekiston Respublikasi Qonunining 32-moddasi talablariga muvofiq, harbiy yig`inlar davrida, shu jumladan ular o`tkaziladigan joyga borish va u erdan qaytib kelish davrida harbiy xizmatga majburlarning ish joyi (lavozimi) va ish joyidagi o`rtacha ish haqi saqlanib qoladi. Mazkur shaxslar bilan tuzilgan mehnat shartnomasi chaqiruv qog`ozi olingan kundan harbiy yig`inlardan qaytilgunga qadar bo`lgan davrda ish beruvchining tashabbusi bilan bekor qilinishi mumkin emas, korxona, muassasa va tashkilot tugatilgan hollar bundan mustasno.

NEChA YoShGAChA BORISh MUMKIN?

• Tinchlik davrida oddiy askarlar va serjantlar tarkibi lavozimlarida muddatli harbiy xizmatga, shuningdek safarbarlik chaqiruvi rezervidagi xizmatga 18 yoshdan 27 yoshgacha bo`lgan, salomatligiga ko`ra Qurolli Kuchlar safida harbiy xizmatni o`tashga yaroqli erkak fuqarolar chaqiriladilar.

Safarbarlik chaqiruvi rezervidagi xizmat safiga olingan va belgilangan pul badalini Moliya vazirligining Maxsus hisob raqamiga to`liq hajmda to`lagan shaxslar oylik o`quv yig`inlariga jalb etiladi.

HUDUDNI TANLASh MUMKINMI?

Xizmat o`taladigan hududni fuqaroning o`zi tanlash huquqi bormi?

U.Nizamov, Samarqand sh.

• Harbiy yig`inlar Mudofaa vazirligining harbiy qismlari bazasida hududiy prinsip asosida tashkil etiladi. Bu o`rinda safarbarlik chaqiruvi rezervi xizmatchisiga tanlash huquqi berilmaydi.

TO`LOV QANChA?

Bugungi kunda safarbarlik chaqiruvi rezervidagi xizmat uchun to`lov qanchani tashkil etadi? Ushbu pulni to`lash qanday usulda amalga oshirilishi mumkin?

S.Nishonov, Toshkent sh.

• Safarbarlik chaqiruvi rezervi xizmati safiga olingan shaxslar tomonidan to`lanadigan pul badallari miqdori O`zbekiston Respublikasi Prezidentining tegishli Qarori bilan eng kam oylik ish haqining 27,5 baravari etib belgilangan bo`lib, bugungi kunda 3 256 000 so`mni tashkil qiladi.

Pul badallari safarbarlik chaqiruvi rezerviga olingan shaxslar tomonidan xizmatga olingandan keyin bir yil mobaynida aksiyadorlik tijorat Xalq banki muassasalari orqali to`lanadi. Tomonlarning kelishuviga ko`ra to`lov to`liq hajmda bir yo`la yohud bosqichma-bosqich naqd pul to`lash, pul o`tkazish yoki plastik kartochkalar orqali amalga oshirilishi mumkin.

Agar navbatdagi to`lovni to`lash paytida tasdiqlangan eng kam oylik ish haqi miqdori o`zgarsa, u holda badalning qolgan qismi eng kam oylik ish haqining yangidan belgilangan miqdoridan kelib chiqqan holda hisoblanadi.

TO`LASA-Yu, VAQTIDA ChAQIRILMASA-ChI?

To`lovni amalga oshirgan, ammo vaqtida xizmatga bora olmagan yoxud chaqirilmagan holatlarda qanday yo`l tutiladi?

X.Umirov, Toshkent sh.

• Fuqarolarning safarbarlik chaqiruvi rezervi xizmati pul badallarini to`liq to`lashlari, shuningdek xizmat mobaynida oylik harbiy yig`indan o`tishlari safarbarlik chaqiruvi rezervida xizmatni o`tash shartlari hisoblanadi.

Pul badallarni to`liq amalga oshirgan shaxslar yigirma etti yoshga to`lgunga qadar bir oylik harbiy yig`inga jalb etilishlari mumkin.

XORIJGA DOIMIY KETAYoTGANLARGA TALAB QANDAY?

Xorijga doimiy yashashga chiqib ketayotganlardan safarbarlik chaqiruvi rezervidagi xizmat talab qilinishi to`g`rimi?

S.Naimov, Toshkent sh.

• Doimiy yashash uchun xorijga chiqib ketayotgan safarbarlik chaqiruvi rezervida xizmatni o`tayotgan fuqarolar Moliya vazirligi Maxsus hisob raqamiga pul badalini to`liq to`laganlaridan so`ng harbiy hisobdan chiqariladi.

Laylo RUSTAMOVA tayyorladi