Avval xabar qilganimizdek, kecha, 29 may kuni xastalikdan so`ng O`zbekistonda xizmat ko`rsatgan artist, dublyaj ustasi, taniqli aktyor Hoshim Arslonov 64 yoshida olamdan o`tdi.
Aktyor vafoti munosabati bilan O`zbekkino marhumning yaqinlariga ta`ziya izhor qildi.
"O`zbek kino va teatr san`ati og`ir judolikka uchradi. Hoshim Arslonov 1956 yilda Namangan viloyatida tug`ilgan, 1977 yilda Toshkent teatr institutini tamomlagan. 1977 yildan 2017 yilgacha O`zbekiston Davlat drama teatrida faoliyat yuritgan.
Uning kinodagi ishlari ham dik,k,atga loyiq. 1983yildan o`zbek kino san`atida ijodini boshlagan aktyor to shu kunga qadar 30 ga yaqin bir-birini takrorlamas , o`ziga xos rollari bilan o`zbek kino san`atining rivojiga katta hissa qo`shdi. Hoshim Arslonov kinoixlosmandlarga “Uyg`onish” (1983), «Marg`iyona» (1996), «Otamdan qolgan dalalar» (1997), «Alpomish» (2000), «Xo`ja Nasriddin, O`yin boshlandi» (2006), «Chavandoz» (2007), “Aprel-May (2007), “Advokatlar(2008), “So`zsiz sevgi(2010), «Qasos» (2011) , “Qo`qon shamoli (2019) kabi filmlardagi rollari bilan yaxshi tanish va sevimli bo`lib qolgan.
Uning istedodi dublyaj san`atida ham namoyon bo`lib, unda munosib o`rinni egalladi.
O`zbekistonda xizmat ko`rsatgan artist Hoshim Arslonov 2017 yilda Italiyaning Iskya shahrida bo`lib o`tgan xalqaro kinofestivalda «Ulug`bek. Osmon toqiga qo`yilgan narvon» filmidagi roli uchun “Eng yaxshi erkak roli” nominasiyasida g`oliblikni qo`lga kiritib, sovrindor bo`lgan.
Uning kinodagi so`nggi ishi 2019 yilda suratga olingan «101-reys» filmi bo`lib qoldi.
“O`zbekkino” Milliy Agentligi Hoshim Arslonovning oila a`zolariga va yaqinlariga chuqur hamdardlik bildiradi.
O`zbek kinosi, teatri va dublyaj san`atining yorqin vakili - O`zbekistonda xizmat ko`rsatgan artist Hoshim Arslonovning porloq xotirasi u ijro etgan rollarda, u ovoz bergan filmlarda va muxlislar qalbida yashaydi", — deyiladi hamdardlik habarida.
Ma`lumot uchun: Marhumning janozasi bugun, 30 may kuni soat 11:00da Toshkent shahri, Olmazor tumani Zarqaynar ko`chasi, 3-tupik, 6-uyda bo`lib o`tadi.
