Toshkent shahridagi “MMFI” milliy tadqiqot yadro universiteti federal davlat avtonom OTM filialida qabul boshlandi. Bu haqda Davlat test markazi xabar berdi.
“Moskva muhandislik-fizika instituti” Milliy tadqiqot yadro universitetining Toshkent shahridagi filiali 2020/2021 o`quv yili uchun abiturientlardan hujjatlar qabul qilinmoqda.
Eng yuqori ballarni to`plagan 100 nafar abiturient to`liq davlat granti asosida o`qishga kirish imkoniyatiga ega bo`ladi.
Hujjatlarni onlayn rejimida qabul qilish 15 iyundan 2 iyulga qadar davom etadi.
Bu yil hujjatlar bakalavriatning yadro energetikasi va issiqlik fizikasi hamda issiqlik energetikasi va issiqlik texnikasi yo`nalishlari bo`yicha qabul qilinadi.
Abiturientlar joriy yilning 15 iyuligacha bo`lgan vaqtda matematika, fizika va rus tili fanlaridan imtihon topshiradi.
Imtihon natijalari 15 iyul kuni e`lon qilinadi.
