2020/2021 o`quv yilida Toshkent davlat yuridik universiteti magistraturasiga kirish imtihonlarini yangicha tartibda o`tkazish rejalashtirilmoqda. Bu haqda Vazirlar Mahkamasining “Toshkent davlat yuridik universiteti magistraturasiga o`qishga qabul qilish tartibi to`g`risidagi nizomlarni tasdiqlash haqida”gi qarori loyihasi e`lon qilindi.
Unga ko`ra Toshkent davlat yuridik universiteti magistraturasiga O`zbekiston Respublikasi fuqarolarini o`qishga qabul qilish tartibi to`g`risidagi nizom;
Toshkent davlat yuridik universiteti magistraturasiga xorijiy fuqarolarni o`qishga qabul qilish tartibi to`g`risidagi nizom;
Toshkent davlat yuridik universiteti magistraturasiga ayrim toifadagi abiturientlarni kirish test sinovlarisiz qabul qilish tartibi to`g`risidagi nizom tasdiqlanadi.
2020/2021 o`quv yilidan boshlab quyidagilar inobatga olinadi:
O`zbekiston Respublikasi fuqarolari uchun:
ta`lim shakli – kunduzgi, masofaviy;
kirish imtihoni shakli – test sinovlari;
test sinovlari bo`lib o`tadigan muddat – 5-25 avgust oralig`ida;
test sinovlari o`tkaziladigan til – o`zbek va rus tillari;
test topshiriladigan fanlar – mutaxassislik fanlari va chet tili;
qabul parametrlari bo`yicha o`qitish ko`rinishi – to`lov-kontrakt yoki tabaqalashtirilgan to`lov-kontrakt.
Xorijiy davlat fuqarolari uchun:
ta`lim shakli – kunduzgi, masofaviy;
kirish imtihoni shakli – suhbat;
suhbat bo`lib o`tadigan muddat – 1-25 avgust oralig`ida;
suhbat o`tkaziladigan til – o`zbek, rus va ingliz tillari;
qabul parametrlari bo`yicha o`qitish ko`rinishi – to`lov-kontrakt.
