Qozog`istonning Olmaota viloyati hokimi Omondiq Batalovda koronavirus aniqlandi. Bu haqda viloyat administrasiyasi matbuot xizmatiga tayanib, «RIA Novosti» xabar berdi, deya yozdi Daryo.
Ta`kidlanishicha, hokimning koronavirusga topshirgan testi ijobiy chiqqach, u o`zini izolyasiyalagan.
«Olmaota viloyati hokimi Omondiq Batalov izolyasiyaga ketdi. Afsuski, polimeraza zanjir reaksiyasi yordamida o`tkazilgan test natijasi COVID-19 borligini ko`rsatdi. Hokimda koronavirus kasalligi belgilarsiz kechmoqda», — deyiladi xabarda.
Ma`lumotlarga ko`ra, Batalov o`zini izolyasiyalagan holda davolanish muolajalarini oladi va masofadan turib ishlashni davom ettiradi.
Eslatib o`tamiz, Qozog`istonda koronavirusni yuqtirib olgan mulozimlar soni oshib bormoqda. Bundan avval, Qozog`istonning Birinchi Prezidenti, Elboshi Nursulton Nazarboev, Parlament Majlisi Raisi Nurlan Nigmatulin va sog`liqni saqlash vaziri Eljan Birtanov va Qozog`iston Respublikasi Bosh vazirining o`rinbosari Erali Tugjanovda koronavirus aniqlangani to`g`risida ma`lum qilingandi.
So`nggi ma`lumotlarga ko`ra, Qozog`istonda koronavirus bilan kasallanganlar soni 17 732 kishiga etdi. Hozirga qadar mamlakatda 10 897 kishi virusdan davolanishga muvaffaq bo`lgan, 120 kishi COVID-19 qurboniga aylangan.