O`zbekiston Respublikasi Prezidenti Shavkat Mirziyoev 2 iyul kuni Yaponiya, Koreya Respublikasi va Birlashgan Arab Amirliklari bilan ustuvor qo`shma loyihalarning borishini hamda savdo-iqtisodiy, investision va moliyaviy-texnik hamkorlikni kengaytirish istiqbollarini ko`rib chiqishga bag`ishlangan yig`ilish o`tkazdi. Bu haqda Prezident Matbuot xizmati xabar bermoqda.
Keyingi yillarda ushbu mamlakatlar bilan o`zaro tovar ayirboshlash ko`rsatkichlari muttasil oshib bormoqda, oliy darajadagi uchrashuvlar yakunlari bo`yicha qabul qilingan “yo`l xarita”lari doirasida turli tarmoqlarda yangi kooperasiya loyihalari amalga oshirilmoqda.
Yig`ilishda amaldagi loyihalarni o`z vaqtida amalga oshirish hamda investision hamkorlikni mustahkamlash bo`yicha yangi takliflar ishlab chiqishga alohida e`tibor qaratildi.
Mamlakatimizda yaponiyalik sheriklar bilan hamkorlikda geologiya, kimyo va neft-kimyo, bank-moliya, sog`liqni saqlash va ta`lim kabi sohalarda umumiy qiymati 5,6 milliard dollarlik 48 ta loyiha amalga oshirilayotgani ta`kidlandi.
Xususan, “HIS” kompaniyasi bilan mehmonxona majmualarini qurish, “Isuzu” va «Itochu» kompaniyalari bilan «SamAvto» qo`shma korxonasining ishlab chiqarish quvvatlarini kengaytirish, Yaponiya xalqaro hamkorlik agentligi (JICA) bilan Navoiy issiqlik elektr stansiyasida energetik bloklar barpo etish bo`yicha va ko`plab boshqa loyihalar muvaffaqiyatli amalga oshirilmoqda.
Pandemiyaga qaramay, joriy yilda ikki mamlakat hukumatlari va ishbilarmon doiralari o`rtasidagi o`zaro muloqotlar, shu jumladan zamonaviy axborot texnologiyalari orqali ancha faollashgani qayd etildi.
Yig`ilishda davlatimiz rahbari aniq iqtisodiy dastur va loyihalarni ilgari surish orqali O`zbekiston-Yaponiya amaliy hamkorligini kengaytirish zarurligini alohida ta`kidladi.
Koreya Respublikasi bilan ikki tomonlama hamkorlik ham keyingi yillarda ijobiy sur`at bilan rivojlanmoqda. Joriy yilning boshidan buyon tovar ayirboshlash qariyb 1 milliard dollarga etdi, Janubiy Koreya kapitali ishtirokida 60 ta yangi korxona tashkil etildi, ularning umumiy soni esa 855 taga etdi.
Joriy yilda Toshkent shahrida ko`p tarmoqli bolalar tibbiyot markazi hamda Farg`ona shahrida O`zbekiston-Koreya xalqaro universitetini tashkil etish bo`yicha loyihalar muvaffaqiyatli amalga oshirilgani, ular doirasida 1 mingga yaqin yangi ish o`rinlari yaratilgani ta`kidlandi.
O`zbekiston Respublikasi Prezidenti tomonidan joriy yil 17 aprel kuni Toshkent viloyati Zangiota tumanida tamal toshi qo`yilgan Innovasion ilmiy ishlab chiqarish farmasevtika klasterini qurish ishlari jadal davom etmoqda. Ushbu loyiha doirasida Farmasevtika texnika universiteti hamda dori vositalarini ishlab chiqarish bo`yicha zamonaviy quvvatlarni tashkil etish ko`zda tutilgan.
Qishloq xo`jaligi, AKT, sog`liqni saqlash, kimyo, engil, elektrotexnika, farmasevtika va zargarlik sanoati, ta`lim va innovasiyalar kabi sohalar hamkorlikning istiqbolli yo`nalishlari sifatida belgilandi.
Koreya xalqaro hamkorlik agentligi (KOICA) va Iqtisodiy taraqqiyot fondi orqali moliyaviy-texnik ko`mak dasturlari doirasida umumiy qiymati 750 million dollardan ortiq bo`lgan 17 ta loyiha, jumladan Kimyoviy texnologiyalar markazi, yoshi kattalar uchun klinika tashkil etish, yurtimiz tibbiyot va ta`lim muassasalarini jihozlash loyihalari amalga oshirilmoqda.
Yaponiya va Janubiy Koreya bilan qo`shma loyihalarning amalga oshirilishi natijasida jami 1 milliard dollardan ziyod xorijiy investisiyalarni o`zlashtirish ko`zda tutilmoqda.
Umuman, erishilgan kelishuvlarni to`liq ro`yobga chiqarish 50 mingdan ortiq yangi ish o`rinlarini yaratish, ishlab chiqarish hajmlarini 4,1 milliard dollarga, eksport hajmini esa 1,14 milliard dollarga oshirish imkonini beradi.
2019 yilda Birlashgan Arab Amirliklariga amalga oshirilgan oliy darajali tashrif yakunida salmoqli ikki tomonlama hujjatlar to`plami, shu jumladan savdo-iqtisodiy va investision bitimlar imzolangan edi. Energetika, infratuzilma, kimyo va neft-kimyo, qishloq xo`jaligi, turizm va boshqa sohalarda qo`shma loyihalarni amalga oshirish rejalashtirilmoqda.
Bugungi kunda umumiy qiymati 4 milliard dollardan ortiq aniq loyihalar ishlab chiqilmoqda. BAA sarmoyasi ishtirokidagi korxonalar soni 141 tani tashkil etyapti.
Amirliklar kompaniyalari bilan kelishuvlar o`z natijasini berayotgani ta`kidlandi.
Xususan, “Masdar” kompaniyasi Navoiy viloyatida 500 MVt quvvatiga ega shamol elektr stansiyasi qurilishiga investisiya kiritmoqda, sarmoyalarning umumiy hajmi esa 500 million dollardan oshadi.
Abu-Dabi taraqqiyot fondi ishtirokida e`lon qilingan kapitali 1 milliard dollar bo`lgan qo`shma investisiya kompaniyasi ta`sis etildi. Kompaniya ilk loyihalarni moliyalashtirishni boshladi.
Shuningdek, Abu-Dabi taraqqiyot fondi Samarqand shahrining infratuzilmasini modernizasiya qilishda ishtirok etmoqda.
BAAning “Mubadala” davlat investision kompaniyasi bilan energetika sohasida hamda uglevodorodlar qazib olishni ko`paytirish va ularni chuqur qayta ishlashni tashkil etish bo`yicha loyihalar ishlab chiqilmoqda.
Prezident Shavkat Mirziyoev Yaponiya, Koreya Respublikasi va BAA bilan hamkorlik bo`yicha “yo`l xaritalari”ning 2020 yil uchun belgilangan chora-tadbirlarini to`liq va sifatli bajarish zarurligini ta`kidladi.
Yig`ilishda muhokama qilingan masalalar bo`yicha mutasaddi vazirlik va idoralar rahbarlarining hisobotlari tinglandi, aniq vazifa va chora-tadbirlar belgilab berildi.
