Shuhrat Qo`shoqboevich oshkoralik, shaffoflik masalasida yana bir xalqchil tashabbusni ilgari surdi – rahbarlarning ishdagi natijalariga qarab, ularni ko`krak nishoni bilan siylash.
Bu dushanba kunlari o`tkaziladigan hokimlik soatida aniqlanadi. Oqsoqlikka yo`l qo`ygan shahar, tuman yoki tashkilot kattasining ko`ksiga shu erning o`zida qizil rangli nishon taqiladi. Topshiriqni do`ndirganlarga esa ko`k rangli nishon topshiriladi. Yig`ilishdan chiqib, taqdirlanganlar jurnalistlar orqali xalq oldida hisob beradilar. Oshkoralikmi? Oshkoralik! Hokimiyatning birdan bir manbaasi xalq bo`lgandan keyin uning oldida hisobdorlikni shunday usulda ham qo`llash mumkin.
Bugungi hokimlik soatida yangi tashabbus amaliyotda ilk bor qo`llandi.“Mas`uliyatsiz rahbar” nishonini olish bo`yicha Ulug`nor, Oltinko`l tumanlarining hokimlari Doniyorbek Maxsudov va Nazirjon O`rinboev “peshqadam” bo`lishdi. Tashkilotlar orasida viloyat soliq boshqarmasi boshlig`i Zufarbek Yuldashev va viloyat sanitariya-epidemiologiya osoyishtaligi markazi rahbari Dilmurod Nabievga shunday baho berildi. Andijon shahri hokimi Bahromjon Haydarovga uchta yo`nalish bo`yicha qo`lga kiritgan ko`rsatkichlari uchun 3 marta yashil nishon topshirildi. Marhamat va Xo`jaobod tumanlari hokimlari Bobirjon Yuldashev va Otabek Rasulov esa ikki bora shunday e`tirofga sazovor bo`ldilar. Markaziy bank viloyat boshqarmasi boshlig`i Elyor Usmonov ham ikki bor “Mas`uliyatli rahbar” nishoni berildi.
Uch hafta davomida qatorasiga qizil nishonga loyiq ko`rilgan rahbar masalasi alohida ko`rib chiqilishi ta`kidlandi.
