Prezident Shavkat Mirziyoev 20 iyul kuni arxitektura va qurilish sohasidagi islohotlar natijalariga oid taqdimot bilan tanishdi.
Mamlakatimizda bunyodkorlik ko`lami yil sayin kengaymoqda. Uzoqni o`ylab, hududlarda urbanizasiya jarayoni amalga oshirilyapti. Qishloq joylarda ham qurilish ishlari jadal olib borilmoqda.
Bular, albatta, sohani takomillashtirish, shaffoflikni ta`minlash, ipoteka bozorini rivojlantirishni taqozo etadi. Oxirgi uch yilda shu masalalar bo`yicha Prezidentning qirqqa yaqin qarori qabul qilindi.
Bu sa`y-harakatlarning izchil davomi sifatida davlatimiz rahbarining 2020 yil 13 martdagi farmonida qurilish sohasidagi islohotlarni yanada chuqurlashtirish, byurokratik to`siqlarni kamaytirish, barcha bosqichlarda shaffoflikni ta`minlash, innovasion ishlanmalar va ilg`or axborot texnologiyalarini keng qo`llash chora-tadbirlari belgilangan edi.
Qurilish vazirligi oldiga 337 ta shaharsozlik qoida va normalaridan joriy yilda 60 tasini yangilash vazifasi qo`yilgan. Yil boshida vazirlikda Qurilishda texnik me`yorlash markazi tashkil etilib, unga 15 nafar malakali mutaxassis olingan. Hozirda 33 ta yangi shaharsozlik qoida va normalari ishlab chiqilgan.
Yig`ilishda bu boradagi ishlarni jadallashtirish uchun ilg`or tajribaga ega xorijiy kompaniyani jalb etish bo`yicha ko`rsatma berildi.
Prezidentimiz sohada korrupsiya va “xufiyona iqtisodiyot” holatlarini keskin tanqid qilib, qurilish tenderlarini o`tkazish va pudrat tashkilotlarini tanlash jarayonlarini raqamlashtirish zarurligini ta`kidladi.
