“Вконтакте” асосчиси Павел Дуров жамоаси томонидан ишлаб чиқилган Telegram мессенжери Facebook раҳбарларидан бирига ёқмай қолганга ўхшайди, деб ёзади “Вести”.
Бироз аввал Facebook асосчисига тегишли WhatsApp мессенжери Telegram`га ҳаволаларни блокировка қилиб қўйди, кейинроқ эса Instagram ижтимоий тармоғи худди шундай йўл тута бошлади.
Instagram профили созлаш столида “веб-сайт” деган бўлими борлигини кўпчилик билади. Айнан мана шу ерга фойдаланувчилар ўз ҳаволасини қўйишлари мумкин. Маълум бўлишича, Telegram домени ҳаволалари мазкур ижтимоий тармоқда очилмаяпти. “Веб-сайт” бўлимига Telegram мессенжери билан боғлиқ ҳавола қўйилмоқчи бўлса, “Сиз жойлаштирмоқчи бўлган юкламани Instagram қўллаб-қувватламайди” деган ёзув чиқди.
Мазкур жойга Twitter, Facebook, LinkedIn каби ижтимоий тармоқлар доменлари киритилганда бундай муаммо кузатилмаяпти.