Отасига ва модага бўлган муҳаббати туфайли Мельбрун (Австралия) да яшовчи кичкинтой Харлоу Хербисон-Фуэтес беш йилга Инстаграмнинг мода юлдузига айланди, деб хабар берди “Deti.mail.ru” нашри.
The Daily Mailнинг ёзишича, Харлоунинг отаси Пит Фуэнтес бундан икки йил муқаддам қизига бўлган муҳаббатини “ҳужжатлаштириш”, қизи катта бўлганда бирга томоша қилиш учун ўзига Инстаграм саҳифа очиб олган. Ҳозирда унинг The Daddy Fashion Stylist аккаунтида малла сочли Харлоунинг дунёнинг энг етакчи брендларига мансуб бўлган гўзал либосларини кийиб тушган бир неча суратлари мавжуд. Бу гуруҳ аъзоларининг сони ҳозирги кунда 110 мингдан ошиб кетган.
Бундан ташқари фотоблог яхшигина даромад ҳам келтиради. Блог топаётган маблағнинг барчаси Харлоунинг банкдаги ҳисоб рақамига тушади. Питнинг айтишича, “Харлоу балоғатга етгач, бу пулга автомашина сотиб олиб, саёҳатга чиқиши, кўнгли тусаган нарса учун ишлатиши мумкин”.
Пит ва унинг рафиқаси Жейсон бундан тўрт йил муқаддам Харлоу бир ёшдалиги вақтида Лос-Анжелесдан Мельбурнга кўчиб келган. Харлоу туғилгандан кейин Пит ҳаётини қизига бағишлади — у қизчани дарсга, рақс машғулотига, меҳмонга олиб боради. Шу билан бирга унинг гардероби, соч турмаги ва уйдаги тартиб-интизоми билан шуғулланади. “ Бу мен учун катта иш, аммо шу пайтгача бажарган вазифаларим ичида энг самаралисидир”, – дейди Пит.
Отанинг айтишича, Харлоу ҳали ўзининг машҳурлигини англамайди, у чиройли кийинишни ва суратга тушишни жуда яхши кўради. Пит ҳар куни, кундалик ҳаётда ҳам қўлидан фотоаппаратни қўймайди. У биринчи галда Харлоунинг кайфиятига қарайди, агар қизча суратга тушишни истамаса, съёмка бўлмайди. “Суратга тушиш унинг қалбини қувончга тўлдириши лозим”, дейди Пит.
Харлоунинг шахсий услубчиси вазифасини бажарувчи Пит, қизига кийим танлаётганда унинг қулай ва ихчам бўлишига катта эътибор беради. Унинг айтишича, Харлоу кўйлак кийишни ёқтиради, шу сабабли унинг кўйлак кийиб тушган суратлари бир талай.
“Харлоу қизчаларга хос гўзалликнинг ҳақиқий тимсолидир”, – деди Пит. – У жуда ҳам меҳрибон, ғамхўр ва хайрихоҳ қиз”. У Харлоу билан жуда илиқ муносабатда. “Биз ҳар куни бир-биримизни қанчалик яхши кўришимизни такрорлаймиз, бу сўзлар қучоқлашиш билан ўз тасдиғини топади”, – дейди меҳрибон ота.
