2022 йилнинг биринчи чорагида Ўзбекистонга чет элдан 1,47 млрд долларлик пул ўтказмалари юборилган, бу ўтган йилнинг шу даврига нисбатан 3 фоизга кўп, дейилади Марказий банк хабарида.
Тижорат банклари жисмоний шахслардан январь — март ойларида 2,11 млрд (38%) доллар сотиб олган, аксинча ушбу муддат давомида 1,73 млрд (69%) долларлик валюта сотган.
Таъкидланишича, бугунги кунда одамларга қулай шароит яратиш мақсадида тижорат банкларида Золотая Корона, Western Union, Contact, MoneyGram, Migom, Unistream, RIA Money Transfer, Азия-Экспресс, Intel Express, UPT каби халқаро пул ўтказмалари тизимлари ишлаб турибди. Уларда чет элдан халқаро пул ўтказмаси орқали келиб тушган пул маблағларини ўз хоҳишларига кўра, чет эл валютасида ёки миллий валютада олиш имкониятлари яратилган.
Бундан ташқари, масофавий тарзда жисмоний шахслар банк биноларига ташриф буюрмаган ҳолда халқаро пул ўтказмалари тизими орқали келиб тушган пул маблағларини ўзларининг банк карталарига тўғридан-тўғри қабул қилиб олишлари бўйича барча зарурий чоралар кўрилган.
