Кеча Ўзбекистон бўйлаб кузатилган ёмғир айрим ҳудудларга сел келишига сабаб бўлди.
Хусусан, бир муддат аввал Жиззахда юзага келган ҳолат бўйича хабар бергандик.
Шундан сўнг, ижтимоий тармоқларда Самарқандда ҳам шундай ҳодиса акс этгани билан боғлиқ хабарлар тарқалди.
Вилоят Фавқулодда вазиятлар бўлимининг маълум қилишича, Иштихон тумани Боғихон маҳалласида кучли ёғингарчилик сабабли сел тошқинлари вужудга келган ва ички сув ариқларнинг етарли даражада мавжуд эмаслиги ҳамда мавжудлари ҳам тозаланмаганлиги сабабли сел тошқини Боғихон қишлоғининг ички йўлларидан ўтиб кетган.
Таъкидланишича, ушбу вазият тўғрисида ФВБ ҳеч қандай хабар келиб тушмаган.
Бироқ туман ФВБ масъул ходимлари вазият тўғрисида ижтимоий тармоқларда тарқалган видео лавҳа орқали хабар топиб, зудлик билан воқеа жойига етиб бориб ўрганиш ишларини олиб борганда сел тошқини фуқароларга ҳеч қандай зарар келтирмасдан оқиб ўтиб кетганлиги аниқланган.
Шунингдек, Самарқанд шаҳар Бедил кўчасида ҳам сув тўпланиб қолгани айтилди.
Шу боис, кўп қаватли уйларнинг бирда фуқароларга ФВБ ходимлари томонидан барча керакли амалий ёрдамлар кўрсатилиб, кучли ёғингарчилик сабабли тўпланган сувларни чиқариб ташлаш ишлари амалга оширилган.
Шу жумладан, Самарқанддаги энг йирик савдо марказини ҳам “сув босди".
Ижтимоий тармоқда тарқалган тасвирларда роппа-росса бир йил олдин фойдаланишга топширилган “Family Park” кўнгилочар савдо марказининг том қисмидан сув оқаётганини кўриш мумкин.
Қайд этилишича, мазкур ҳудуд атрофида Самарқанд вилояти Фавқулодда вазиятлар бошқармаси ходимлари томонидан сувдан тозалаш ишлари амалга оширилган.
