Кечагина дунёнинг бошқа нуқтасида қўлланилган инновацион муолажа усулини қисқа муддатда Ўзбекистонда татбиқ этишда хорижий ҳамкорлик масаласи ўта муҳим. Шу боис, Италиянинг Равенна шаҳридаги “Santa Maria delle Croci” госпитали раҳбари, Эмилия-Романья ҳудуди бош травматологи Альберто Беллуатини мамлакатга таклиф этилди. Бу ҳақда ССВ хабар бермоқда.
Вазирлик хабарига кўра, таниқли шифокорнинг ташрифи кутилганидек самарали бўлди. У Ўзбекистонга сафари давомида Республика ихтисослаштирилган травматология ва ортопедия илмий-амалий тиббиёт марказида бўлиб, тўрт нафар беморда юқори технологик мураккаб операциялар ўтказгани айтилади.
"Аслида чаноқ-сон бўғимларини эндопротезлаш амалиёти муассаса мутахассислари учун янгилик эмас",-дейди вазирлик.
Қайд этилишича, бу борада шифокорларимиз катта тажриба ва салоҳият тўплаган. Аммо бу галги беморларнинг ҳолати анча мураккаб бўлган.
"Масалан, улардан бирига “икки томонлама коксартроз, коронавирусдан сўнгги синдром, иккала сон суяклари бошчаларининг асептик некрози” ташхиси қўйилган эди. Италиялик шифокор ўзбекистонлик ҳамкасблари иштирокида бу дардни даволаш учун ноёб амалиёт ўтказишга қарор қилди. Натижада бир вақтнинг ўзида беморнинг иккала чаноқ-сон бўғимига замонавий эндопротез мосламалари ўрнатилди. Икки соат давом этган операция муваффақиятли ўтди",-дейилади хабарда.
Маълум қилинишича, Альберто Беллуатини томонидан 20 нафардан ортиқ беморлар консультация қилинган. Марказнинг реабилитация, артроскопия, спорт травматологияси, жароҳатлар оқибати ҳамда катталар травматологияси бўлимларида тиббий кўриклари ташкил қилинган.
Шунингдек, Республика ихтисослаштирилган травматология ва ортопедия илмий-амалий тиббиёт марказининг “Santa Maria delle Croci” госпитали билан ҳамкорлик алоқаларини йўлга қўйиш юзасидан музокаралар олиб борилгани айтилади.
