Шавкат Мирзиёев бугун, 7 сентябрь куни Ўзбекистондаги дипломатик миссиясини якунлаётган Америка Қўшма Штатлари Фавқулодда ва Мухтор элчиси Дэниел Розенблюмни қабул қилди.
Президент Дэниел Розенблюмнинг Ўзбекистон-АҚШ стратегик шериклик муносабатларини ривожлантиришдаги ҳиссасини алоҳида қайд этди, дея хабар бермоқда давлат раҳбари матбуот хизмати.
Қайд этилишича, кейинги йилларда у билан конструктив-сиёсий мулоқот йўлга қўйилган
"Биргаликдаги саъй-ҳаракатлар билан савдо-иқтисодий ҳамкорлик кенгайиб бормоқда. Ўзаро савдо ҳажми ошмоқда, АҚШнинг етакчи компаниялари иштирокида қатор инвестиция лойиҳалари амалга оширилмоқда. Таълим ва соғлиқни сақлаш соҳаларида икки томонлама дастурлар жорий этилмоқда", – дея маълум қилинади.
Эслатиб ўтамиз, Ўзбекистон Президентининг жорий йил август ойида қабул қилинган фармонига мувофиқ америкалик дипломат юксак давлат мукофоти – “Дўстлик” орденига сазовор бўлган.
АҚШ элчиси унинг фаолиятига берилган юқори баҳо учун самимий миннатдорлик билдирган, бундан буён ҳам мамлакатлар ўртасидаги кўп қиррали ҳамкорликнинг мустаҳкамланишини фаол қўллаб-қувватлашда давом этишини таъкидлаган.
