Қайд этилишича, футболчи АҚШда ўтказилаётган йиғин давомида бел қисмидаги оғриқлар сабаб сўнгги машғулотларда ҳамда Канада ва Нидерландия терма жамоаларига қарши ўртоқлик учрашувларида майдонга тушмаган.
ЎФА маълумотига кўра, сўнгги ҳафталарда Машариповда бел қисмида оғриқлар кузатилган. Дастлаб дори-дармон ва физиотерапия муолажалари орқали унинг аҳволи яхшиланган. Бироқ кейинчалик оғриқлар яна қайта бошланган.
Ўтказилган магнит-резонанс томографияси (МРТ) текшируви натижалари футболчида аввал кузатилган умуртқалараро диск чурраси қайта ҳуруж қилганини кўрсатган.
Айни вақтда Жалолиддин Машариповнинг ҳолати Миллий терма жамоа тиббий штаби томонидан назоратга олинган. ЎФАнинг билдиришича, якуний тиббий хулосалар олингач, жамоатчиликка қўшимча маълумот тақдим этилади.
Маълумот учун, Жалолиддин Машарипов Ўзбекистон миллий терма жамоасининг етакчи футболчиларидан бири ҳисобланади ва унинг эҳтимолий узоқ муддатли йўқотилиши жамоа учун жиддий муаммо бўлиши мумкин.
