Навоий вилоятининг Навбаҳор туманида гиёҳвандлик воситалари билан боғлиқ қонунбузарлик ҳолати аниқланди. Бу ҳақда ҳуқуқни муҳофаза қилувчи органлар маълум қилди.
Маълум қилинишича, тумандаги «Ўзбекистон» маҳалласи профилактика инспектори Баҳриддин Юлдошев хизмат вазифасини бажараётган вақтда маҳалла ҳудудида шубҳали ҳаракатланаётган шахсни пайқаган.
Маҳалла аҳолисини яхши танийдиган инспектор мазкур фуқаро билан суҳбатлашишга уринган. Бироқ сархуш ҳолатда бўлган шахс ходимнинг қонуний талабларига бўйсунмасдан, воқеа жойидан узоқлашишга ҳаракат қилган.
Шундан сўнг ҳодиса жойига Навбаҳор тумани ички ишлар бўлимининг тезкор-тергов гуруҳи жалб қилинган. Фуқарони кўздан кечириш жараёнида унинг ёнидан қоғозга ўралган, тахминан 7 грамм марихуанага ўхшаш модда топилган.
Тезкор тадбирлар давомида гумонланувчининг яшаш манзили ҳам текширилган. Натижада унинг томорқасида заҳриқотил ўсимлигини ноқонуний равишда етиштириб келаётгани аниқланган.
Қайд этилишича, профилактика инспекторининг сергаклиги ва тезкор ҳаракатлари натижасида мазкур қонунбузарликка чек қўйилган.
Ҳозирда ушбу ҳолат юзасидан гумонланувчига нисбатан Жиноят кодексининг 276-моддаси 1-қисми билан жиноят иши қўзғатилган. Дастлабки тергов ҳаракатлари олиб борилмоқда.
