Ёшларнинг бўш вақтларини мазмунли ўтказишда спортнинг ўрни катта аҳамият касб этмоқда. Давлатимиз раҳбарининг "Янги Ўзбекистон" келажаги ҳисобланган ёшларни соғлом, билимли ва ватанпарвар этиб тарбиялашдаги саъй-ҳаракатлари барчага бирдек намуна бўлмоқда.
Айни шу боис, Қашқадарёда жорий йилнинг 17-21 октябрь кунлари Қарши шаҳрида теннис спорт туридан ҳам "Вилоят ҳокими кубоги" мусобақаси бўлиб ўтди. Бу ҳақда ҳокимлик ахборот хизмати хабар бермоқда.
Мазкур баҳсларда мезбонлардан ташқари Жиззах, Навоий, Сурхондарё, Бухоро, Самарқанд вилоятлари ҳамда Тошкент шаҳридан 150 нафардан ортиқ спортчи ёшлар иштирок этишди.
Якуний натижаларга кўра, умумжамоа ҳисобида 1-ўринни Қашқадарё, 2-ўринни Бухоро ва 3-ўринни Сурхондарё вилояти ёшлари эгаллади.
Ғолиб-совриндор бўлган иштирокчилар вилоят ҳокими томонидан медал ва эсдалик совғалари билан тақдирланди.
