Алиментчи аёл Туркия сафари учун эрига 43 млн. сўм тўлашига тўғри келди. Бу ҳақида МИБ Матбуот хизмати хабар бермоқда.
Фуқаролик ишлари бўйича Жиззах туманлараро судининг қарорига асосан қарздор она З.Х.дан ундирувчи эри Т.Х. фойдасига икки нафар вояга етмаган фарзандининг моддий таъминоти учун ҳар ойлик иш ҳақи ва даромадининг 1/3 -қисми миқдорида алимент ундириш белгиланган. Ижро ҳужжати Бюронинг Ш.Рашидов туман бўлимига 2019 йил 9 апрелда келиб тушган. Шунингдек, қарздор онанинг Ўзбекистон Республикасидан чиқиш ҳуқуқи чекланган.
Бироқ, болаларнинг онаси З.Х. 2017 йилда Туркия давлатига чиқиб кетганлиги сабабли алимент пулларини ундириш имкони бўлмаган.
Ижро ҳаракатлари давомида қарздор аёл 2023 йил 30 декабрь куни Ўзбекистонга келиб, ўзига нисбатан қўйилган чеклов сабаб Туркия давлатига чиқиб кета олмаган.
Шундан сўнг, аёл фарзандлари вояга етгунга қадар алимент қарздорликни бир йўла 43 миллион сўм нақд пулда тўлаб берган.
Давлат ижрочиси томонидан унга нисбатан қўйилган барча чекловлар бекор қилиниб, ижро иши тамомланган.
