Tashkent City Mall савдо марказида “Жадидлар. Туркистонга мактублар” номли жадидларнинг таълим ва маориф соҳасидаги ташаббусларига бағишланган мультимедиа кўргазмаси бўлиб ўтмоқда. Унда Туркистондан Германияга ўқишга юборилган талабалар ва уларнинг минтақа маданий-маърифий меросига қўшган ҳиссаси ҳақида ҳикоя қилинади.
Кўргазма 18 июль куни иш бошлаган. 1400 квадрат майдонда 5 та зал турли хил мультимедиа дизайнларида намойиш этилмоқда. Намойишда тарих фанлари номзоди Баҳром Ирзаев томонидан тўпланган архив материаллари орқали ўзбек, рус ва инглиз тилларидаги визуал ва аудио инсталляциялар билан таъминланган бир қанча бўлимлар ўрин олган.
Кўргазмада нодир архив материаллари: мактублар, мақолалар ва фотосуратлар ҳам намойиш этилмоқда. Таъкидланишича, уларнинг кўпчилиги биринчи марта жамоатчиликка тақдим этилмоқда.
Мультимедиа дизайни овоз, аудио, видео ва юксак дид билан жойлаштирилган жиҳозлар билан ажойиб муҳитни яратган.
"Ҳар бир залда бир-бирига умуман ўхшамаган ғайритабиий ҳисларни туйдим. Ҳозирги замондан узилиб, ҳақиқатда жадидлар даврида яшаётгандек, улар билан ёнма-ён тургандек ҳис қилдим ўзимни. Кўргазмага келганлар учун жадидларга мактуб ёзиш ёки кўргазма ҳақида фикрларимизни қолдириш имконияти ҳам яратилибди", - дейди томошабинлардан бири.
Кўргазма вақти:
Душанбадан пайшанбагача соат 10:00 дан 22:00 гача;
Жума, шанба ва якшанба кунлари соат 10:00 дан 00:00 гача.
Нархлари:
Пайшанба куни - бепул;
Жума, шанба ва якшанба кунлари - 60 000 сўм;
Бошқа кунлар - 40 000 сўм.
Мактаб ўқувчилари, талабалар ва нафақахўрлар чипталарни iticket кассаларида харид қилишда 50% чегирмага эга бўлади. Махсус мактаблар ва мактаб-интернатлар ўқувчилари ва 10 ёшгача бўлган болаларга кириш бепул.
Darakchi.uz мазкур кўргазмадан фоторепортаж тайёрлади:
.jpg)
