340 миллиондан ортиқ обуначига эга бўлган MrBeast ва Жанубий Африка Республикасидан бўлган ёзувчи, геймер ҳамда нейропсихолог Тея Бойсен тропик соҳилдаги тўй маросимида никоҳдан ўтди.
Жуфтлик 2024 йил Рождество байрамидаги совчиликдан сўнг тўйга тайёргарлик кўрган. Тея Бойсен эса никоҳдан олдин Италияда бир ойлик қизлар даврасидаги байрамни нишонлаган.
Доналдсон никоҳ маросимида содда ва замонавий оқ костюм кийди. У тўй суратларини ижтимоий тармоқда эълон қилиб, "Миссис Бистни топдим. Бу ҳаётимдаги энг гўзал кун бўлди", деб ёзди.
Келинлик либосидаги Тея Бойсен эса ижтимоий тармоқдаги исмини "Тея Доналдсон"га ўзгартирди.
Йиллик даромади 700 миллион долларга етадиган MrBeast дунёдаги энг бой контент яратувчиларидан бири ҳисобланади. Унинг никоҳ тўғрисидаги хабари қисқа вақт ичида ижтимоий тармоқларда кенг тарқалди.
