Сўнг ҳуқуқбузарга нисбатан маъмурий иш қўзғатилиб, ҳужжатлар судга юборилди.
Ижтимоий тармоқларда тарқалган видеода Сурхондарё вилоятида эркак ит боласининг қулоқларини ваҳшийларча узиб ташлагани кўринган.
Ҳолат юзасидан Ички ишлар вазирлиги Жамоат хавфсизлиги департаменти Матбуот хизмати маълумот берди. Унга кўра, ҳуқуқбузарга нисбатан Ўзбекистон Республикаси Маъмурий жавобгарлик тўғрисидаги кодексининг 111-моддаси асосида маъмурий баённома расмийлаштирилган.
Тўпланган ҳужжатлар қонуний чора кўриш учун суд органларига юборилган.
Ҳуқуқбузар видеода ўз қилмишидан пушаймон эканини билдириб, “Минг бор узр сўрайман. Қилган ишимдан пушаймонман”, деган.
