Тошкентда демократик жараёнларга бағишланган халқаро давра суҳбати ўтказилди

Тошкентда Демократик жараёнларни таҳлил қилиш маркази томонидан “Демократик жараёнларни янада такомиллаштириш: замонавий ёндашувлар ва халқаро тажриба” мавзусида халқаро давра суҳбати ўтказилди.
Унда мамлакатимизда олиб борилаётган конституциявий ислоҳотлар, халқ ҳокимиятини мустаҳкамлаш, янги сайлов тизими ва сиёсий рақобатни ривожлантириш, нодавлат нотижорат ташкилотлар фаолиятини қўллаб-қувватлаш, оммавий ахборот воситалари эркинлигини таъминлаш борасида амалга оширилган муҳим қадамлар ва эришилган натижалар чуқур таҳлил қилинди.
Тадбирда Буюк Британия, Канада, Озарбайжон, Миср, Покистон, Россия каби давлатлардан халқаро даражадаги экспертлар, таниқли мутахассислар ўз маърузалари билан қатнашдилар.
Халқаро давра суҳбатида сўнгги 7-8 йил давомида мамлакатимизда чуқур демократик ислоҳотлар ортга қайтмас одимлар билан илдамлаётгани, инсон ҳуқуқ ва манфаатлари устувор бўлган Янги Ўзбекистонни бунёд этишдаги инсонпарварлик сиёсати, ижтимоий давлатчиликка асосланган конституциявий ислоҳотлар, гендер тенглик, аёллар ва болалар ҳуқуқлари кафолатини таъминлаш, давлат бошқарувида хотин-қизлар иштирокини кенгайтириш, давлат органларининг ҳисобдорлиги ва очиқлигини ошириш борасида амалга оширилаётган ҳаракатлар ва уларнинг натижалари алоҳида эътироф этилди.
Шунингдек, тадбир иштирокчилари сўнгги йилларда давлатимиз раҳбари томонидан жаҳоннинг энг юксак сиёсий минбарларида, йирик халқаро тадбирлар ва учрашувларда илгари сурилган ва халқаро эътирофларга сазовор бўлган муҳим ташаббуслар хусусида ҳам тўхталиб ўтдилар.
Бундан ташқари, маърузалардан янги таҳрирда қабул қилинган Ўзбекистон Республикаси Конституцияси, янгича шакл ва моҳиятга эга сайлов тизими мисолида юртимизда инсон қадри ва манфаатларига эътибор, давлат бошқарувида жамоатчилик иштироки ва фаоллигини янада оширишга қаратилган интилишлар самараси кенг ўрин олганини алоҳида қайд этиш мумкин.
–   Ўзбекистондаги сайлов меъёрлари халқаро стандартларга, хусусан  Европа кенгашининг Венеция комиссияси андозаларига ҳам мос ва ҳатто устувор жиҳатлари ҳам бор, – деди Россия иқтисодиёт олий мактаби доценти Кирилл Молодико. – Масалан, Ўзбекистонда сайловда овоз бериш учун кимнинг келмагани назоратга олинмайди ва ҳатто ошкор ҳам этилмайди. Бу жараёнга мутлақо эркин тарзда ёндашилади. Шу билан бирга, сайловолди учрашувларда маҳаллий ҳокимликлар томонидан бепул бинолар ажратилиши диққатга сазовор.  
Қизғин мулоҳазаларга бой ўтган анжуман нафақат фикр алмашиш, балки юртимизда демократик жараёнларни янада жадаллаштириш бўйича амалий таклифлар ишлаб чиқиш учун ҳам муҳим майдон бўлиб хизмат қилади. Хусусан, хорижий тажрибаларни ўрганиш ва уларни миллий амалиётимизга татбиқ этиш имконини беради.
Халқаро давра суҳбати доирасида амалга оширилган маҳаллий ва хорижий экспертлар ўртасидаги дўстона мулоқот Ўзбекистондаги демократик ислоҳотларни янада чуқурлаштириш ва такомиллаштиришга хизмат қиладиган қимматли таклиф ва тавсиялар ишлаб чиқишда ўз самарасини беради.