Бош прокуратура ҳузуридаги Департамент қошидаги Алкоголь ва тамаки бозорини тартибга солиш инспекцияси томонидан лизенция талаб ва шартларига кўра, ишлаб чиқариш қувватларини бажарилиши ва лицензия тўловларини амалга оширилиши юзасидан профилактик тушунтириш ишлари амалга оширилди. Бу ҳақда инспекция матбуот хизмати хабар қилди.
Унда асосий эътибор ишлаб чиқаришдаги камчиликларни бартараф этиш ва лицензия тўловларини ўз вақтида амалга оширилиши борасида тадбиркорлик субъектларига ҳуқуқий тушунчалар беришга қаратилмоқда.
Жорий йилнинг ўтган даврида Инспекция томонидан алкоголь маҳсулотлари ишлаб чиқараётган 51 та корхонадан 5 таси ишлаб чиқаришдаги камчиликларни бартараф этиш бўйича чоралар кўрмаганлиги ҳамда лицензия тўловларни ўз вақтида тўламаганлиги сабабли белгиланган тартибда огоҳлантирилди.
Маълумот ўрнида, Ўзбекистон Республикаси Вазирлар Маҳкамасининг 21.02.2022 йилдаги Қарори билан тасдиқланган ягона Низомга кўра истеъмол ва техник этил спирти, алкоголь маҳсулотлари ишлаб чиқариш фаолияти бўйича лицензия олган санадан бошлаб ўттиз кундан ортиқ бўлмаган муддатда йиллик тўловларни тўлаши белгилаб берилган.
Ўзбекистон Республикасининг 2021 йил 14 июлдаги “Лицензиялаш, рухсат бериш ва хабардор қилиш тартиб-таомиллари тўғрисида”ги Қонунига мувофиқ истеъмол ва техник этил спирти, алкоголь маҳсулотлари ишлаб чиқариш фаолияти лицензияланиши ва лицензиянинг амал қилиниши учун йиллик давлат божлари тўланиши белгиланган.
Шунингдек, ушбу Қонун билан лицензия берилганлиги учун давлат божи ёки рухсат этиш хусусиятига эга ҳужжат берилганлиги учун йиғим белгиланган муддатда тўланмаганда бекор қилиниши ҳамда бекор қилиш ваколатли орган қарори билан амалга оширилиши белгиланган.
