Бу ҳақда Олий Мажлиснинг Инсон ҳуқуқлари бўйича вакили (омбудсман) ахборот хизмати хабар берди.
Маълум қилинишича, мазкур хабарлар юзасидан Омбудсманнинг Бухоро вилоятидаги минтақавий вакили муассасага ташриф буюриб, ҳолатни ўрганган.
Хусусан, мурожаатда тилга олинган шахс билан ҳоли суҳбат ўтказилиб, унинг сақланиш шароитлари, билдирилган важлар ҳамда танасида жароҳат излари мавжуд ёки мавжуд эмаслиги текширилган.
Қайд этилишича, ҳолат юзасидан 4-сон тергов ҳибсхонасининг айрим ходимларига нисбатан терговга қадар текширув ҳаракатлари бошланган. Шунингдек, мурожаатда қайд этилган шахсга нисбатан суд-тиббий экспертиза тайинланган.
Ўрганиш жараёнида тўпланган ҳужжатлар ва бошқа материаллар Жиноят-процессуал кодекси талабларига мувофиқ процессуал қарор қабул қилиш учун Бухоро вилояти прокуратурасига тақдим этилган.
Омбудсман мазкур ҳолат юзасидан олиб борилаётган текширув ва ўрганиш ишларини ўз ваколатлари доирасида назорат қилиб боришини маълум қилди.
