Давлат раҳбари спортни соғлом турмуш, интизом ва мамлакат нуфузини белгилайдиган муҳим куч сифатида таъкидлади.
Сўнгги йилларда юзлаб спорт иншоотлари барпо этилгани, ёшлар орасида профессионал спортга қизиқиш ошгани қайд этилди. Фақат ўтган йилнинг ўзида ўзбекистонлик спортчилар халқаро ареналарда 450 дан ортиқ олтин медални қўлга киритди, ўнлаб рекордлар янгиланди.
Шу билан бирга, мавжуд имкониятлар тўлиқ ишлатилмаётгани танқид қилинди. Масалан, Зарбдор туманида оммавий спорт яхши йўлга қўйилгани эътироф этилган бўлса, бошқа ҳудудларда бу борада ишлар сустлиги кўрсатиб ўтилди. Айрим ҳокимлар спортга бефарқ экани алоҳида қайд этилди.
Мактабларда эса спорт тўгараклари кўп ҳолларда “номига” ишлаётгани айтилди. Жиззах вилояти, Қашқадарё вилояти ва Фарғона вилоятида ўқувчиларнинг катта қисми жисмоний тайёргарлик талабларини бажара олмаган.
Йиғилишда спорт мактаблари иқтидорли ёшларни излаб топиш ўрнига тайёр спортчилар билан ишлаётгани ҳам танқид қилинди. Жумладан, Самарқанд вилоятида мавжуд имкониятларга қарамай, ёшларни қамраб олиш даражаси пастлигича қолмоқда.
Президент барча ҳудудларда оммавий спортни ривожлантириш, мактабларда тўгаракларни кучайтириш ва Зарбдор тажрибасини кенг жорий этиш бўйича аниқ топшириқлар берди.
