Олий Мажлиснинг Инсон ҳуқуқлари бўйича вакили (Омбудсман)нинг Сирдарё вилоятидаги минтақавий вакили вилоятдаги 40-манзил-колониясига мониторинг ташрифини амалга ошириб, қатор камчиликларни аниқлаган эди.
Мониторингда маҳкумларнинг яшаш, овқатланиш, яқинлари билан учрашув хоналари, тиббий хизматдан фойдаланиш ҳамда меҳнат шароитлари ўрганилган. Жумладан, маҳкумлар ишлаётган ишлаб чиқариш объектларидаги шароитлар ҳам ўрганилган.
Аниқланишича, Манзил-колониядаги маҳкумларни фойдали меҳнатга жалб этиш бўйича 6 та МЧЖ билан шартномалар тузилиб, ҳозирги кунда жами 155 нафар маҳкум ишга жалб этилган.
Ўрганишлар давомида баъзи ишлаб чиқариш объектларида маҳкумлар учун ажратилган ювиниш хоналари талаб даражасида эмаслиги ҳамда овқатланиш шароитлари санитария-гигиена талабларига жавоб бермаслиги аниқланди. Шунингдек, МЧЖлар билан тузилган шартномадаги маҳкумларга инсон организмининг нормал ҳаётини таъминлайдиган озуқага бой иссиқ овқат билан таъминлаш бўйича шартларнинг бузилаётгани маълум бўлган. Ушбу камчиликларни бартараф этиш бўйича Ички ишлар вазирлиги ҳузуридаги Жазони ижро этиш департаменти 3-минтақавий ҳудуд бошлиғига 2025 йилнинг январь ойида Омбудсман тақдимномаси киритилган эди.
Ушбу Минтақавий ҳудуднинг Омбудсманга маълум қилишича, манзил-колония раҳбари томонидан ишчи гуруҳ тузилиб, аниқланган камчиликлар юзасидан МЧЖ раҳбарларига тегишли “Талабнома” киритилиб, ишлаб чиқариш объектларида аниқланган камчиликлар бартараф этилган.
Бундан ташқари, Омбудсман тақдимномасида келтирилган камчиликларга йўл қўйилгани бўйича Манзил-колониядаги 7 нафар ходимга нисбатан огоҳлантириш берилган.
Навбатдаги мониторинг ташрифларида айни ҳолатлар қайта текширилади.
Маҳкумлар учун муносиб шарт-шароитларни таъминлаш ва уларнинг ҳуқуқларини ҳимоя қилиш йўлида амалга оширилаётган бу саъй-ҳаракатлар давлатнинг “Инсон қадри учун” тамойилига қатъий содиқлигини яна бир бор намоён этди.
