Агар Вашингтон Эронга зарба беришга ёки ичкаридан исён кўтаришга уринса, уни “кучли жавоб зарбаси" кутмоқда. Бу ҳақда бугун, 31 март куни Эрон олий раҳнамоси Оятуллоҳ Али Хоманаий маълум қилди.
Унинг сўзларига кўра, Эрон АҚШ ва Исроил давлатлари билан доимий душман бўлиб келган.
“АҚШ ва Исроилнинг душманлиги ҳар доим бўлган. Улар бизга ҳужум қилиш билан таҳдид қилишмоқда, биз буни эҳтимолдан йироқ деб ҳисоблаймиз. Бироқ улар бирор ножўя иш қилиб қўйса, қаттиқ зарба ейди”, дея огоҳлантириш берган Эрон олий раҳнамоси.
Хоманаий, шунингдек, душманнинг Эрон ичида қўзғолон уюштириш ниятлари ҳам эътибордан четда қолмаслигини айтган.
“Агар улар (АҚШ) ўтган йилларда бўлгани каби мамлакат ичида исён уюштиришни ўйласа, Эрон халқи уларни ўзи бартараф этади”, деган у.
Маълумот учун, 2015 йил июль ойида Эрон ва Буюк Британия, АҚШ, Россия, Франция, Хитой ва Германияни ўз ичига олган бир гуруҳ давлатлар ўртасида Венада Қўшма кенг қамровли ҳаракатлар режаси имзоланган. Ҳужжат томонларнинг қоидалари ва мажбуриятларини назарда тутган. Хусусан, Эрон 15 йил давомида уранни 3,67 фоиздан ортиқ бойитмаслик ва бойитилган уран захирасини 300 кг дан оширмаслик мажбуриятини олган. Шунингдек, Теҳрон қўшимча оғир сув реакторлари қурмасликка, 130 тоннадан ортиқ оғир сув тўпламасликка ва ядровий турдаги портловчи қурилмаларни ишлаб чиқмасликка ваъда берган. Аммо 2018 йилда Дональд Трампнинг биринчи президентлик муддати пайтида Қўшма Штатлар музокаралар кенгашидан чиққан. Бунга жавобан Эрон ўзининг технологик салоҳияти ва юқори даражада бойитилган уран захираларини сезиларли даражада оширган.
